Daśledčy centr «HeadHunter Biełaruś» i prajekt «Praca.tut.by» praviali apytańnie 1.196 čałaviek i vyśvietlili, što kožny siomy biełarus nie adčuvaje sabie kamfortna na pracoŭnym miescy.
«Asnoŭnaja pryčyna dyskamfortu — zanadta vysokaja ci, naadvarot, vielmi nizkaja tempieratura ŭ ofisie. Druhaja pa raspaŭsiudžanaści pryčyna — vialikaja kolkaść ludziej, jakija pracujuć u adnym pamiaškańni.
Apošnim časam usio bolšuju papularnaść nabyvajuć ofisy farmatu open space. I niahledziačy na toje, što padobnaje płanavańnie pracoŭnaj prastory maje šerah pieravah, ludzi nie zaŭsiody adčuvajuć siabie ŭtulna. U takich ofisach, jak praviła, bolš šumna, asabliva kali śpiecyjalisty vymušanyja ŭvieś čas hutaryć z klijentami i partniorami, vieści telefonnyja pieramovy. Zanadta ciesnyja ofisy, niepryvabny interjer i niazručnaja mebla taksama nie spryjajuć pracazdolnaści supracoŭnikaŭ», — adznačyła dyrektar «HeadHunter Biełaruś» Śviatłana Šaparava.
Pavodle vynikaŭ apytańnia, poŭnaściu zadavolenyja svaim pracoŭnym miescam tolki čverć biełarusaŭ. Kab stvaryć spryjalnuju atmaśfieru, mnohija supracoŭniki dapaŭniajuć svaju pracoŭnuju prastoru asabistymi rečami, bo heta ŭźnimaje nastroj i spryjalna adbivajecca na praduktyŭnaści pracy.
Pry hetym 23% respandentaŭ ličać, što pabočnyja rečy tolki adciahvajuć ad pracoŭnaha pracesu, a ŭ niekatorych kampanijach naohuł nie pryniata zachoŭvać toje, što nie adnosicca da pracy.
Najbolš časta na svaim pracoŭnym miescy rabotniki raźmiaščajuć suvieniry i statuetki (32%), kvietki (27%), fatahrafii blizkich i siabroŭ abo płakaty i postary (16%).
Kiraŭniki mnohich kampanij aktyŭna sadziejničajuć stvareńniu ŭtulnaści ŭ ofisie i spryjalnaj pracoŭnaj atmaśfiery: pry nieabchodnaści robiać ramont (24%), pastajanna vydzialajuć srodki na kvietki i dekaratyŭnyja elemienty (21%), abnaŭlajuć meblu (19%).
