Hazieta «Pskovskaja hubiernija», jakaja vydajecca miascovym deputatam Lvom Šłośbierham, apublikavała rasšyfroŭku razmovaŭ dvuch mierkavanych pskoŭskich desantnikaŭ, ź jakich vynikaje, što ŭ bajach na terytoryi Ukrainy zahinuli amal usie sałdaty 1-j roty 76 pskoŭskaj dyvizii Pavietrana-desantnych vojskaŭ Rasii.
Ciapier sajt haziety nie dastupny, ale materyjał pa-raniejšamu dastupny ŭ kešy. Taksama frahmienty pieramovaŭ publikuje Slon.ru
Materyjały z rasšyfroŭkaj pieramovaŭ źjavilisia ŭ novym numary haziety «Pskovskaja hubiernija» 2 vieraśnia. Vydaŭcom haziety źjaŭlajecca Leŭ Šłośbierh — deputat miascovaha zakanadaŭčaha schodu ad partyi «Jabłoko». Na ŭmovach ananimnaści jamu pieradali zapisy pieramovaŭ vajskoŭcaŭ hetaj dyvizii. «Pskovskaja hubiernija» miarkuje, što niama padstavaŭ dla sumnieńniaŭ u sapraŭdnaści pradstaŭlenych zapisaŭ.
Zhodna ź pieramovami dvuch mierkavanych sałdat 76 pskoŭskaj dyvizii PDV, z usioj roty udałosia vyžyć tolki prykładna dziesiaci bajcam - zahinuli kala 70 sałdat.
U liku zahinułych byŭ Leanid Kičatkin, čyja mahiła była znojdziena na mohiłkach u vioscy Vybuty pad Pskovam 25 žniŭnia. Pa słovach surazmoŭcaŭ, kolkaść zahinułych mahła być i vyšej — da 140 čałaviek — bo havorka išła nie pra rehularnyja padraździaleńni, a pra śpiecyjalna ukamplektavanyja.
«Hołas 2: Tak pačakaj, hladzi, b …, jak ciapier vyličyć, chto žyvy, chto miortvy?
Hołas 1: Śpisy. Nu ŭ śpisie tam čałaviek dziesiać nas zastałosia ŭ žyvych. Zasieja voś ja pamiataju, kali my źjazdžali adtul, jechali praz pole, ja Zasieja bačyŭ. Z 7-j jon abo z 8-j. Jany ŭsie razam z boju, jany ŭ druhoj rocie byli»
Taksama ź pieramovaŭ vynikaje, što 16 žniŭnia rota była pierakinutaja na terytoryju Ukrainy, dzie 20 žniŭnia pskoŭskija desantniki likvidavali błokpost ukrainskich vajskoŭcaŭ, a taksama hrupu braniatechniki.
Paźniej kala nasielenaha punkta Hieorhijeŭka rotu nakryli masiravanym artyleryjskim udaram. Na dumku adnaho z udzielnikaŭ pieramovaŭ, heta tłumačycca tym, što ŭ rajonie bajoŭ pracuje «amierykanskaja bryhada» radyjoelektronnaj baraćby.
Nahadajem, što ŭviečary 29 žniŭnia na vydaŭca haziety «Pskovskaja hubiernija» Lva Šłośbierha, jakomu pieradali zapisy pieramovaŭ, nieviadomyja ździejśnili napad. U vyniku Šłośbierh trapiŭ u lakarniu sa šmatlikimi traŭmami. Sam deputat, a taksama lidar partyi «Jabłyk» Siarhiej Mitrochin i zasnavalnik partyi Hryhoryj Jaŭlinski źviazali napad z rasśledavańniem Šłośbierha ab hibieli pskoŭskich desantnikaŭ. Pa padazreńni ŭ źbivańni deputata byli zatrymanyja try čałavieki, ale paźniej palicyja adpuściła padazravanych, spasyłajučysia na pakazańni śviedak złačynstva, jakija paćvierdzili, što deputata źbili nie hetyja ludzi.
Akramia taho, u pieramovach dvuch mierkavana desantnikaŭ zhadvajecca telekanał «Dožd́»:
«Hołas 2: Łyčki? Čuješ, a heta, dakumienty jakija-niebudź prymušali padpisvać, typu, b …, ab nievydavańni, febesy nie pracavali?
Hołas 1: Tam febesy pracavali, ale jany, mabyć, da nas nie paśpieli dabracca. Ty ž bačyŭ, što na sajtach robicca. Ja na sajt chacieŭ ŭčora zaleźci, tam dzie … telekanał «Dožd́» vystaviŭ, typu, voś, na mahiłach vajennych źniali tablički. Ch …, a jon zabłakavany ŭžo sajt».
