U Minsku padpisany pratakoł ab spynieńni ahniu na paŭdniovym uschodzie Ukrainy z 18.00 5 vieraśnia.
Ab hetym paviedamiła žurnalistam pradstaŭnik ABSIE Adelchiejd Taljavini pa vynikach pieramoŭ kantaktnaj hrupy pa ŭrehulavańni situacyi va Ukrainie.
«U nas jość dobraja navina — my padpisali pratakoł ab nieadkładnym spynieńni ahniu siońnia z 18.00», — skazała jana.
«Premjer-ministr» samaabvieščanaj Łuhanskaj narodnaj respubliki Ihar Płatnicki paćvierdziŭ: «Narodnyja respubliki doŭha abmiarkoŭvali heta pytańnie. Hatovyja z 18.00 da dvuchbakovaha spynieńnia ahniu».
Pry hetym jon padkreśliŭ: pahadnieńnie ab spynieńni ahniu «nie aznačaje, što heta źjaŭlajecca źmianieńniem kursu našaha, što kurs na adździaleńnie zakončycca». «Heta tolki miery, kab spynić pralivać kroŭ», — zajaviŭ Płatnicki.
U svaju čarhu «premjer-ministr» Danieckaj narodnaj respubliki Alaksandr Zacharčanka adznačyŭ, što padpisańnie siońniašniaha pahadnieńnia «dapamoža zachavać žyćci ludziej, nie tolki mirnych hramadzian, ale i tych, chto sa zbrojaj u rukach adstojvaje svaje ideały».
Pieramovy kantaktnaj hrupy doŭžylisia kala dźviuch hadzin. Ukrainski bok na ich pradstaŭlaŭ były prezident Ukrainy Leanid Kučma, rasijski — pasoł RF u Kijevie Michaił Zurabaŭ, ABSIE — aficyjny pradstaŭnik dziejnaha staršyni ABSIE pa pytańniach urehulavańnia situacyi va Ukrainie Adelchiejd Taljavini, sieparatystaŭ Danbasa — lidary bajevikoŭ «DNR» i «ŁNR» Alaksandr Zacharčanka, Andrej Purhin, Ihar Płatnicki i Alaksiej Karakin.
Jak paviedamlałasia raniej, svaje mirnyja płany ŭ Minsk pryvieźli pradstaŭniki troch bakoŭ — Ukrainy, Rasii i Danbasa.
Paśla zakančeńnia sustrečy žurnalistaŭ papiaredzili: budzie zroblena tolki karotkaja zajava dla ŚMI, adkazy na pytańni nie praduhledžany.
