Prezident Ukrainy Piatro Parašenka zajaŭlaje, što damoŭlenaści, dasiahnutyja siońnia na sustrečy trochbakovaj kantaktnaj hrupy ŭ Minsku, u pryvatnaści, ab spynieńni ahniu, hruntujucca na jaho mirnym płanie.
Takuju zajavu Parašenka zrabiŭ ŭ Ńjuporcie.
«Jak vam viadoma, u Minsku na trochbakovaj kantaktnaj hrupie byŭ padpisany pratakoł adnosna implemientacyi majho mirnaha płana. U hetym pratakole ŭkazany kankretnyja praktyčnyja kroki, jakija pakładuć pačatak miru i stabilnaści ŭ Danieckim i Łuhanskim rehijonach z pavahaj suvierenitetu, terytaryjalnaj cełasnaści i niezaležnaści Ukrainy. Ciapier heta — klučavyja pytańni, asnova dla pošuku mirnaha vyrašeńnia kryzisu», — skazaŭ prezident.
Pa słovach Parašenki, važna, kab spynieńnie ahniu ciahnułasia doŭha, i ŭ hety čas praciahvaŭsia palityčny dyjałoh, «jaki zmoža prynieści mir i stabilnaść na Danbas».
«Taksama jość darožnaja karta z kankretnymi datami, kali budzie vykanany kožny z punktaŭ, nazvanych u pratakole», — dadaŭ jon.
Prezident jašče raz padkreśliŭ, što hety praces hruntujecca na jaho mirnym płanie, na «terytaryjalnaj cełasnaści, suvierenitecie i niezaležnaści majoj krainy».
Raniej na samicie NATA Parašenka abviaściŭ 14 punktaŭ svajho mirnaha płanu:
1. Harantyi biaśpieki dla ŭsich udzielnikaŭ pieramovaŭ.
2. Vyzvaleńnie ad kryminalnaj adkaznaści tych, chto skłaŭ zbroju i nie ździejśniŭ ciažkich złačynstvaŭ.
3. Vyzvaleńnie zakładnikaŭ.
4. Stvareńnie 10 km bufiernaj zony na ŭkrainska-rasijskaj dziaržaŭnaj miažy. Vysvad niezakonnych uzbrojenych farmavańniaŭ.
5. Harantavany kalidor dla vychadu rasijskich i ŭkrainskich najmitaŭ.
6. Razzbrajeńnie.
7. Stvareńnie ŭ struktury MUS padraździaleńniaŭ dla ažyćciaŭleńnia sumiesnaha patrulavańnia.
8. Vyzvaleńnie administracyjnych budynkaŭ, jakija niezakonna ŭtrymlivajucca u Danieckaj i Łuhanskaj abłaściach.
9. Adnaŭleńnie dziejnaści miascovych orhanaŭ ułady.
10. Adnaŭleńnie centralnaha tele-i radyjoviaščańnia ŭ Danieckaj i Łuhanskaj abłaściach.
11. Decentralizacyja ŭłady (šlacham abrańnia vykankamaŭ, abarona ruskaj movy — prajekt źmianieńniaŭ Kanstytucyi).
12. Uzhadnieńnie hubiernataraŭ da vybaraŭ z pradstaŭnikami Danbasa (pry ŭmovie ŭzhadnieńnia adzinaj kandydatury, pry roznahałośsiach — rašeńnie prymaje prezident).
13. Daterminovyja miascovyja i parłamienckija vybary.
14. Prahrama stvareńnia pracoŭnych miescaŭ u rehijonie.
