Siońnia hetaja atmaśfiernaja źjava moža naziracca navat na poŭdni krainy z-za dvuch mahutnych uspyšak na Soncy.
Zachod Vieniery padčas nievialikaha palarnaha źziańnia. Vioska Viazyń nad Vilejskim vadaschoviščam. Fota Viktara Małyščyca
Pra heta pišuć sajty, pryśviečanyja astranomii va ŭsim śviecie.
Tak, Space.com paviedamlaje pra vielmi mahutnyja ŭspyški na Soncy, jakija ŭ dadzieny momant dasiahnuli Ziamli i bambardujuć jaje, što moža pryvieści da nizkašyrotnych palarnych źziańniaŭ. Havorycca pra dva mahutnia vykidy karanarnaj masy z pavierchni Sonca, pieršy ź jakich adbyŭsia 8 vieraśnia i na dadzieny momant užo dasiahnuŭ Ziamli. Druhaja mahutnaja ŭspyška adbyłasia ŭ sieradu i dasiahnie našaj płaniety akurat bližejšaj nočču.
«Pry ŭmovach čystaha nieba palarnyja źziańni buduć dastupnyja dla nazirańniaŭ u noč ź piatnicy na subotu», — skazaŭ dyrektar astranamičnych prahnozaŭ ŭ Kałarada Tomas Bierhier. Taksama jon adznačaje, što momanty, kali dźvie ŭspyški takoj mahutnaści adbyvajucca adna za adnoj, vielmi redkija. Hetyja patoki soniečnaha vietru mohuć pradstaŭlać pahrozu dla spadarožnikaŭ i astranaŭtaŭ u kosmasie, a taksama mohuć paškodzić techniku, źviazanuju z kamunikacyjaj i navihacyjaj, i nanieści škodu enierharaźmierkavalnikam na pavierchni Ziamli.
Nazirać palarnaje źziańnie možna budzie ŭ paŭnočnaj častcy nieba. Rekamiendujecca vystavić doŭhuju ekspazicyju na kamiery i pasprabavać źniać nieba: matryca fotaaparata zmoža pieradać niabačnyja dla voka śvietłavyja vahańni načnoha nieba.
Viadoma, što ŭ narmalnych umovach palarnyja źziańni nieŭłaścivyja šyrotam, u jakich raźmieščana Biełaruś. Choć padčas vysokaj soniečnaj aktyŭnaści časam «šancuje» Viciebskaj vobłaści, zvyčajna palarnyja źziańni adbyvajucca na šyrotach 67-70°. Ličycca, što ŭ dni nakštałt siońniašniaha palarnyja źziańni mohuć być zaŭvažnyja paŭsiudna na płaniecie až da trapičnych šyrot.
