Alaksandr Łukašenka prosić Suśvietny bank (SB) pašyryć finansavańnie prajektaŭ darožnaha budaŭnictva ŭ Biełarusi.
Na sustrečy 16 vieraśnia ź vice-prezidentam SB pa rehijonie Jeŭropy i Centralnaj Azii Łoraj Tak, jakaja znachodzicca ź vizitam u Minsku, Łukašenka, u pryvatnaści, skazaŭ: «Vielmi vas prašu, kab u płanie pašyreńnia finansavańnia, jakoje praduhledžvajecca na hety i nastupny hady, byli vydzielenyja Suśvietnym bankam dadatkovyja resursy dla budaŭnictva aŭtamabilnych daroh u Biełarusi».
Pavodle słoŭ Łukašenki, biełaruskija śpiecyjalisty pradstaviać Suśvietnamu banku płany i prajekty, u tym liku pa darožnym budaŭnictvie. «Dumaju, vy padtrymajecie ich. Tym bolš heta nie stolki intares Biełarusi, kolki Jeŭrapiejskaha sajuza, Rasii i Azii, — cytuje kiraŭnika dziaržavy jaho pres-słužba. — Kali takaja padtrymka budzie, harantuju, što praz try-čatyry hady darožnaja sietka, asabliva pa madernizacyi transpartnych kalidoraŭ, stanie šyrejšaj u dva razy i lepšaj».
Łukašenka adznačyŭ, što Suśvietny bank akazvaje Biełarusi vialikuju padtrymku ŭ budaŭnictvie aŭtamabilnych daroh.
«Suśvietny bank razumieje, što Biełaruś źjaŭlajecca tranzitnaj dziaržavaj, i ad taho, jakija tut buduć darohi, budzie zaležać efiektyŭnaść ekanomiki jak Uschodu, tak i Zachadu», — padkreśliŭ jon.
Pavodle słoŭ kiraŭnika dziaržavy, u Biełarusi pryniatyja peŭnyja prahramy na 2014 i 2015 hady «z prystojnym abjomam finansavańnia». «Ale Suśvietny bank paabiacaŭ, što heta finansavańnie moža być jašče šyrejšym. U suviazi z tym, što inšyja susiednija tranzitnyja dziaržavy pamiž Jeŭropaj i Uschodam ciapier u ciažkim stanoviščy (asabliva Ukraina), Biełaruś źjaŭlajecca najbolš pryvabnaj krainaj tranzitu», — adznačyŭ Łukašenka. Jon taksama dadaŭ, što ŭ Biełarusi pryniatyja dadatkovyja miery pa budaŭnictvie i madernizacyi isnujučych transpartnych kalidoraŭ pamiž Jeŭropaj i Azijaj.
Biełaruś taksama zacikaŭlena i ŭ padtrymcy Suśvietnym bankam inšych prahram, dadaŭ Łukašenka.
Kiraŭnik dziaržavy padziakavaŭ SB za supracoŭnictva i za acenku, dadzienuju Biełarusi ŭ štohadovaj spravazdačy Suśvietnaha banka.
«Skažu adkryta, my śpiecyjalna nie pracujem, kab spadabacca ŭsim u śviecie, ale chaciełasia b, kab my Suśvietnamu banku padabalisia», — zajaviŭ Łukašenka.
Jon nie vyklučyŭ, «što nad dziejnaściu Suśvietnaha banka pieravažajuć niejkija palityčnyja faktary». «Ale toje, što Suśvietny bank źjaŭlajecca najmienš palityzavanaj finansava-ekanamičnaj strukturaj, — heta fakt, pra heta havorać tyja prajekty i prahramy, pa jakich my z vami supracoŭničajem», — ličyć Łukašenka.
Jon adznačyŭ vialikuju dapamohu SB u madernizacyi enierhietyčnaj bazy Biełarusi. Heta, pavodle słoŭ Łukašenki, dało mahčymaść značna prasunucca ŭ enierhaefiektyŭnaści, a taksama ŭ pieraadoleńni nastupstvaŭ katastrofy na ČAES.
«Mabyć, nichto nam bolš nie dapamahaje, čym Suśvietny bank», — skazaŭ Łukašenka i dadaŭ: «Biełaruś adkaža na heta dabrom».
