Ź biełaruskaha boku pratačyłasia infarmacyja pra kašmarnuju canu, što załomvaje "Hazprom" na 2008 hod — 165 dalaraŭ za tysiaču kuboŭ.
Symptamatyčna, što na sajcie BIEŁTA adrazu ž źjaviłasia davoli niezvyčajnaja dla aficyjnych medyjaŭ infarmacyja: prahnoz inflacyi na nastupny hod moža być padvyšany da 10-11% (raniej mierkavałasia 6-8%).
Niadaŭna pradstaŭniki Nacbanku patracili šmat krasamoŭstva, kab pierakanać nasielnictva, što nijakich padstaŭ biehčy pa ŭkłady pierad Novym hodam nia budzie.
U pryvatnaści, namieśnik Prakapoviča Pavał Kałavur na presavaj kanferencyi 27 listapada zajaviŭ: "Adnaznačna mahu skazać, što toj sytuacyi, jakaja była pry kancy hodu letaś i była źviazanaja z padvyšanymi inflacyjnymi dy devalvacyjnymi čakańniami na tle prablemaŭ z cenami na enerhanośbity, sioleta nia budzie".
I kali zaraz ułada musić uskosna pryznavać pahrozu raskručvańnia inflacyjnaj śpirali, to vyhladaje na toje, što sytuacyja na pieramovach z "Hazpromam" sapraŭdy surjoznaja.
Zrešty, ni dla koha nie sakret i ščylnaja pijaraŭskaja supraca menedžeraŭ hetaj karparacyi z Kramlom. Tak što napalvańnie cenavych žarściaŭ moža być i artpadrychtoŭkaj pierad vizytam Pucina ŭ Miensk. Prylacić i spytaje: mo' chočacie tańniejšaha hazu? :) A dalej — zahinańnie palcaŭ.
Razam z tym, apakaliptyčnyja prahnozy datyčna losu niezaležnaści nie adnojčy hučali i raniej. Adnak biełaruskaje kiraŭnictva, padviesiŭšy toje ci inšaje pryncypovaje dla Maskvy pytańnie — kštałtu adzinaj valuty (maŭlaŭ, padumajem, uzvažym), raz za razam atrymlivała taktyčny vyjhryš u vyhladzie pralanhacyi niejkich ilhotaŭ. A potym — prabačcie!
Nia vyklučana, što padobnaja taktyka budzie ŭžytaja i hetym razam suprać Pucina. Miensk paprosić tajm-aŭt, kab jašče raz hruntoŭna abmazhavać varyjanty Kanstytucyjnaha aktu. Pa vynikach pieramoŭ baki kanstatujuć namier "paskoryć intehracyjnyja pracesy" ci niešta padobnaje. Ciaham nastupnych niekalkich miesiacaŭ rasiejskamu kiraŭnictvu budzie pa vialikim rachunku nie da Biełarusi.
Ale ž i Pucin dobra vyvučyŭ hetuju taktyku. Tak što "hazavy kluč" moža akazacca nie adzinym u jahonym bahažy.
