Biełaruś hatova abmiarkoŭvać palityčnyja i ekanamičnyja pytańni ź Jeŭrasajuzam i Złučanymi Štatami Amieryki, zajaviŭ namieśnik ministra zamiežnych spraŭ Alaksandr Hur`ianaŭ 17 vieraśnia na pres-kanfierencyi ŭ Minsku.
«Ja mahu skazać, što adnosiny z partniorami ŭ našym rehijonie zaŭsiody dynamična raźvivalisia. Na žal, z našymi partniorami na Zachadzie ekanamičnaje supracoŭnictva i praktyčnaje ŭzajemadziejańnie časam natykalisia na pieraškody ŭ vyhladzie palityčnaj pazicyi. I siońnia možna skazać, što našy adnosiny ź Jeŭrapiejskim sajuzam, najbližejšymi susiedziami ź ES, sa Złučanymi Štatami znachodziacca ŭ dynamicy», — skazaŭ jon.
Pavodle słoŭ Hur`ianava, «dyjałoh — heta samaje hałoŭnaje, što daje mahčymaść vyrašać pytańni i ruchać pracesy, uličvajučy ŭzajemnyja intaresy». «My nieadnarazova padkreślivali, što ekanomika i ŭ cełym sacyjalna-ekanamičnaje raźvićcio dla Biełarusi — heta pryjarytet. Tamu zasiarodžvać uvahu vyklučna na palityčnych pracesach nie ŭ intaresach našaj krainy», — skazaŭ jon.
Hur`ianaŭ adznačyŭ, što, «na ščaście, siońnia razumieńnie peŭnaje nastaje ŭ častcy taho, što Biełaruś hatova abmiarkoŭvać i palityčnyja pytańni, jakija cikaviać našych zachodnich kalehaŭ, ale i paralelna ruchać ekanamičnyja prajekty, jakija cikavić biźnies».
Namieśnik ministra taksama skazaŭ, što «situacyja va Ukrainie dla našaj krainy vielmi blizkaja z punktu hledžańnia, što heta susiedzi, i my nie chacieli b bačyć niejkija dalejšyja ŭskładnieńni».
«My nie chacieli b, kab chtości havaryŭ, što ŭskładnieńnie stanovišča va Ukrainie niejkim čynam vykarystoŭvajecca Respublikaj Biełaruś dla ŭłasnaha pazicyjanavańnia. Tut my kažam pra toje, što ŭsio spaznajecca ŭ paraŭnańni. I peŭnaja palityčnaja stabilnaść, i stabilnaść pracesaŭ u krainie daje padstavy havaryć biźniesu, dzie lepš pracavać», — adznačyŭ jon.
Nahadajem, namieśnik ministra zamiežnych spraŭ Alaksandr Hur`ianaŭ sustrakaŭsia 9 vieraśnia ŭ MZS ź mižviedamasnaj delehacyjaj ZŠA, jakaja znachodziłasia ŭ Minsku z 8 pa 11 vieraśnia.
Pa vynikach hetaha vizitu namieśnik pamočnika dziaržsakratara ZŠA pa pytańniach demakratyi, pravoŭ čałavieka i pracy Tomas Mielia zajaviŭ, što pytańnie palitźniavolenych pa-raniejšamu zastajecca pieraškodaj na šlachu supracoŭnictva pamiž Biełaruśsiu i ZŠA. Pavodle jaho słoŭ, pytańnie pra palitźniavolenych uźnimałasia padčas sustrečy mižviedamasnaj uradavaj delehacyi ZŠA ŭ MZS Biełarusi.
U Ńju-Jorku 22 vieraśnia ŭpieršyniu projdzie Biełaruska-amierykanski inviestycyjny forum.
