Suda pa administracyjnaj spravie Maryny Małčanavaj 18 vieraśnia nie adbyłosia. Žurnalistka zajaviła, što joj nieabchodny abaronca, i sudździa Natalla Čarapucha dała joj niekalki dzion dla zaklučeńnia damovy z advakatam. Nastupnaje pasiadžeńnie pryznačana na 15.30 u aŭtorak.
Karespandentku «Bobrujskoho kuŕjera» Marynu Małčanavu abvinavačvajuć u parušeńni artykuła 22.9 Administracyjnaha kodeksu – niezakonnym vyrabie i raspaŭsiudzie pradukcyi ŚMI.
Babrujskaja milicyja stavić u vinu žurnalistcy jaje publikacyju ŭ žniŭni 2014 hoda na sajcie telekanała «Biełsat».
4 vieraśnia na Marynu Małčanavu skłali administracyjny pratakoł. Jak raspaviała karespandentka, padpałkoŭnik milicyi Siarhiej Rudźko spačatku dazvoliŭ joj rabić vypiski z materyjałaŭ spravy, a potym staŭ vychoplivać ich z ruk, adbirać zroblenyja joju vypiski. Spravu pieradali ŭ sud.
«Ja pahartała materyjały spravy, i peŭnyja momanty mianie niepryjemna ŭrazili, - kaža Maryna Małčanava. — Naprykład, u adnym z dakumientaŭ sa słoŭ padpałkoŭnika Rudźko śćviardžajecca, što ja sama spravakavała kanflikt u adździaleńni UUS. Nibyta heta ja nakinułasia na jaho, adabrała papiery, źmiała ich i kinuła na padłohu! Takoj nachabnaści ja nie čakała. Siońnia (18 vieraśnia) ja chacieła zrabić fotakopii hetych dakumientaŭ, ale sudździa Natalla Čarapucha nie dazvoliła. Mnie pryjšłosia litaralna łavić staršyniu suda ŭ kalidory, bo da jaho ŭ kabiniet mianie nie puścili, kab uziać dazvoł na kapijavańnie. Jon skazaŭ, što jamu treba padumać da zaŭtrašniaha dnia».
Składańnie administracyjnych pratakołaŭ suprać žurnalistaŭ, jakija nibyta pracujuć biez akredytacyi na zamiežnyja ŚMI, nabyvaje charaktar kampanii.
Tak ciaham leta i pačatku vosieni ŭžo suprać siami biełaruskich žurnalistaŭ milicyjaj byli raspačatyja administracyjnyja spravy za nibyta parušeńnie paradku vyrabu pradukcyi ŚMI – pracu biez akredytacyi.
U toj ža čas usie mižnarodnyja žurnalisckija arhanizacyi zaklikajuć ułady Biełarusi skasavać anachraničny paradak akredytacyi, jaki parušaje prava na dostup da infarmacyi. Pradstaŭnica ABSIE pa svabodzie ŚMI Dunia Mijatavič padčas svajho aficyjnaha vizitu ŭ Minsk 15-16 vieraśnia 2014 h. taksama akcentavała ŭvahu na nieabchodnaści admianić abaviazkovuju akredytacyju žurnalistaŭ.
