 Alaksandar Kulinkovič |
Biełaruskija rok‑hurty «Niejra Dziubiel», «Pałac», «Krama» i «N.R.M.» płanujuć pravieści vialiki sumiesny kancert. Pra heta paviedamiŭ lider hurta «Niejra Dziubiel» Alaksandr Kulinkovič 6 śniežnia ŭ Minsku na prezientacyi novaha alboma «Stasi».
A.Kulinkovič pakul nie nazvaŭ miesca praviadzieńnia kancerta, skazaŭšy tolki, što «heta budzie vialikaja zała». Płanujecca, što kancert projdzie ŭ kancy studzienia 2008 hoda. Taksama, pavodle jaho słoŭ, arhanizujecca kancertnaja prezientacyja novaha alboma «Niejra Dziubiela». Jon zaznačyŭ, što atrymana papiaredniaja zhoda na praviadzieńnie kancerta ŭ adnym sa staličnych kłubaŭ.
Nahadajem, kancertnaja prezientacyja alboma «Stasi», zapłanavanaja na 14 listapada hetaha hoda, była admieniena. Na praciahu apošnich niekalkich hadoŭ hurt nie mieŭ mahčymaści arhanizoŭvać vialikija kancerty ŭ Minsku, vystupajučy ŭ asnoŭnym u susiednich krainach i nievialikich haradach Biełarusi. Niehałosnuju zabaronu na kancertavańnie muzykanty atrymali paśla ŭdziełu ŭ akcyjach apazicyi. Takoje stanovišča hurtu znajšło adlustravańnie ŭ naźvie novaha alboma «Niejra Dziubiela». «Stasi» — heta raźviedka byłoj Hiermanskaj Demakratyčnaj Respubliki, jakaja ŭ časy chałodnaj vajny ličyłasia adnoj z samych mocnych śpiecsłužbaŭ u śviecie. Pavodle słoŭ A.Kulinkoviča, sens hetaj nazvy ŭtrymlivajecca ŭ zapievie pieśni «Stasi»: «Nie čuvać, ale śpiavajem».
Jak raniej paviedamlaŭ BiełaPAN, 21 listapada lidery rok‑hurtaŭ «Niejra Dziubiel», «Krama», «N.R.M.» i «Pałac» sustrelisia z kiraŭnikom hałoŭnaha ideałahičnaha ŭpraŭleńnia Administracyi prezidenta Biełarusi Aleham Pralaskoŭskim. Padčas sustrečy jon paabiacaŭ padtrymku biełaruskim muzykantam, skazaŭšy, što ŭ ich bolš nie budzie prablem z arhanizacyjaj kancertaŭ. Sustreča vyklikała vialiki hramadski rezanans: muzykantaŭ abvinavačvali ŭ tym, što jany «pradalisia» ŭładam. A.Kulinkovič abvierhnuŭ u intervju BiełaPAN takoje śćviardžeńnie, a taksama vykazaŭ sumnieńnie, što «paśla hetaj sustrečy adrazu niešta źmienicca». Na prezientacyi novaha dyska jon zaznačyŭ, što pakul nie adčuvaje niejkich asablivych źmien paśla vizitu ŭ Administracyju prezidenta.
 |
 |
