— Mužyki, a što vy tut budujecie? — Haścinicu budujem. — Chutka skončycie? — Čort viedaje. My unutranaj adździełkaj zajmajemsia. Niby da zimy jašče praca tut budzie. A jak u inšych — nie skažam.
Dvoje budaŭnikoŭ, jakich sustrakaju z pakietami małaka ŭ rukach niedaloka ad cyrka, nie vielmi havarkija. Ci to raskazvać pra svoj abjekt nie chočuć, ci to sami niašmat viedajuć. I druhi varyjant całkam realny.
Na pašparcie abjekta napisana, što budujecca tut šmatfunkcyjanalny kompleks i hatel «Kiempinski». Praŭda ŭ press-słužbie «Kiempinski» u Maskvie Jeŭraradyjo kažuć, što nijakich damovaŭ u Biełarusi nie majuć. Na sajcie ŭ płanach taksama niama hatela hetaj sietki ŭ Minsku.
«My ŭ hetym prajekcie bolš nie udzielničajem, jak kampanija «Kiempinski». Na dadzieny momant u Biełarusi ŭ nas niama nivodnaj padpisanaj damovy».
Raniej byli takija płany, ale padpisanaj damovy niama, ci budzie ŭ pres-słužbie nie viedajuć.
Voś, što kaža niekalki hadoŭ tamu Reto Vitvier, hałoŭny ŭpraŭlajučy hrupaj hatelaŭ «Kiempinski».
«Minsk dla nas źjaŭlajecca prajektam najvyšejšaj važnaści. My prysutničajem u Rasii, vielmi dobra ŭ Jeŭropie. Ale Minsk dahetul adsutničaŭ u našaj stratehii. Tut my majem mahčymaść pracavać u histaryčnym centry i heta najbolš kaštoŭna dla nas».
Kiraŭnik Minharvykankama Mikałaj Ładućka taksama akcentavaŭ uvahu, što budujecca mienavita «Kiempinski».
«Dla nas hety prajekt z punktu hledžańnia naroščvańnia pasłuh nieacenny. Hatel «Kiempinski» znachodzicca ŭ 140 krainach śvietu. Znachodziciesia vy ŭ Kiejptaŭnie, a ŭ daviedniku, jaki lažyć u vas u numary, budzie haścinica «Kiempinski» ŭ Minsku. Dla nas heta pryncypova važna, i my adčyniajem siońnia siabie…», — kazaŭ jon.
Pra adkryćcio hatela «Kiempinski», zajaŭlali ŭ krasaviku 2014 hoda da čempijanatu pa chakiei ŭ Minsku. Ukaz prezidenta navat prapisvaje kankretnuju datu — «ŭvod u ekspłuatacyju puskavoha kompleksu, jaki ŭklučaje haścinicu, da 1 maja 2014 hoda».
U tekście ŭkaza taksama havorycca, što budujecca mienavita hatel «Kiempinski». I budujecca da čempijanata śvietu pa chakiei.
Z hetaj nahody ukaz daje šmat ilhotaŭ dla budaŭnictva. Tavary, jakija ŭvoziacca z-za miažy, vyzvalenyja ad mytnych pošlin i PDV. Zamoŭca budaŭnictva vyzvalajecca ad pakryćcia vydatkaŭ na znos budynkaŭ, adličeńniaŭ u fon prezidenta pa padtrymcy kultury i mastactva, ziamla dajecca ŭ arendu biez aŭkcyjona. Taksama ukaz rekamienduje Minharvykankamu vyzvalić zamoŭcu ad metavych zboraŭ u haradski biudžet.
Praŭda, navat z takimi šykoŭnymi lhotami budynak nie paśpieli pabudavać da čempijanatu. I dahetul budoŭla za vysokim płotam, na abodvuch ujezdach šłahbaumy i budki z kantralorami, praz ščyliny ŭ płocie možna razhledzieć, što da zdačy budynka jašče daloka.
U dadatak stała viadoma, što sama sietka «Kiempinski» nijakaha dačynieńnia da budoŭli nie maje. Mała što tam na płocie napisana.
STAA «Elit Estejt» była stvoranaja ŭ lutym 2012 hoda.
Zasnavalnikami tavarystva stali hrupa kampanij «Trajpł», jakaja naležyć Juryju Čyžu, i TAA «Sici Estejt» z Maskvy. Za dva hady isnavańnia sajt kampanii tak i nie zapracavaŭ u poŭnym režymie. Adzinym viadomym prajektam «Elit Estejt» zastajecca budaŭnictva hatela «Kiempinski» u centry Minska.
***
Ukaz prezidenta Respubliki Biełaruś ad 11.05.2010 № 243
Vyzvalić zakazčyka ad:
— Pakryćcia strat, jakija pryčyniajucca ziemlekarystalnikam adabrańniem ziamielnaha ŭčastka i znosam raźmieščanych na im abjektaŭ nieruchomaści ŭ suviazi z budaŭnictvam kompleksu, a taksama inšych raschodaŭ, źviazanych z adabrańniem i (abo) pradastaŭleńniem ziamielnaha ŭčastka
— Abaviazka ažyćciaŭlać adličeńni ŭ fond Prezidenta Respubliki Biełaruś pa padtrymcy kultury i mastactva;
— Abaviazacielstvaŭ pa stvareńni i pradastaŭleńniu sacyjalnaha i (abo) słužbovaha žylla katehoryjam hramadzian, vyznačanym zakanadaŭstvam;
Vyzvalić udzielnikaŭ inviestycyjnaha prajekta:
— Ad vypłaty dziaržaŭnaj pošliny za vydaču zamiežnym hramadzianam i asobam biez hramadzianstva śpiecyjalnych dazvołaŭ na prava zajmacca pracoŭnaj dziejnaściu ŭ Respublicy Biełaruś.
— Nazvanych zamiežnych hramadzian i asob biez hramadzianstva — ad vypłaty dziaržaŭnaj pošliny za vydaču dazvołu na časovaje pražyvańnie ŭ Respublicy Biełaruś.
Rekamiendavać Minskamu haradskomu Savietu deputataŭ i Minskamu harvykankamu vyzvalić zakazčyka ad vypłaty metavych zboraŭ u biudžet Minska.
