“Biełaruś zrobić usio, što budzie patrebna, dla zabieśpiačeńnia suverenitetu i biaśpieki Venesueły”, — hetkuju šmatznačnuju zajavu zrabiŭ Alaksandar Łukašenka ŭ Karakasie.
Ci aznačaje heta, što Biełaruś budzie anhažavacca ŭ spravy zaakijanskaj krainy ŭ takoj ža stupieni, jak u svoj čas Kuba ŭ Anhole, a HDR – u Efijopii?
Alaksandar Łukašenka zrabiŭ takuju dalokasiažnuju zajavu paśla aficyjnaha adkryćcia sumiesnaha biełaruska-venesuelskaha pradpryjemstva pa zdabyčy nafty, jakoje adbyłosia 8 śniežnia ŭ venesuelskim štacie Ansaatehi.
«Ad imia dobraha i talerantnaha biełaruskaha narodu chaču skazać, što my zrobim dla tvajoj krainy ŭsio, što ty [Uha Čaves] skažaš, kab abaranić jaje suverenitet, biaśpieku i niezaležnaść», — cytuje A. Łukašenku venesuelskaje infarmacyjnaje ahienctva ABN.
Jak zaznačyŭ A. Łukašenka, «dla nas niama zakrytych temaŭ u supracy». «My damovilisia ŭmacoŭvać uzajemadziejańnie dla pabudovy šmatpalarnaha śvietu i supraćdziejańnia zamiežnym siłam», — skazaŭ jon.
A. Łukašenka zaklikaŭ venesuelski narod być udziačnym svajmu prezydentu Čavesu za «addanaść i samaachviarnyja vysiłki ŭ ažyćciaŭleńni sacyjalnych prahram, va ŭmacavańni mižnarodnaha supracoŭnictva na karyść svajoj krainy».
Pry hetym kiraŭnik biełaruskaj dziaržavy paabiacaŭ stvaryć u Venesuele pradpryjemstvy ź pieradavymi technalohijami. «Nie paźniej jak za try hady, u Venesuele buduć stvoranyja vysokatechnalahičnyja pradpryjemstvy ź biełaruskimi technalohijami, zadačaj jakich budzie pahłybleńnie kaaperacyi miž dźviuma krainami», — skazaŭ A. Łukašenka.
Biełarusy chočuć zrabić z Venesueły novy hihancki rynak dla svajoj pradukcyi. MTZ, MAZ, BIEŁAZ, budaŭničyja tresty, prajektnyja biuro — usie jany marać znajści sabie novy rynak za akijanam. Prykładna toje samaje adbyvałasia ŭ saviecki čas, kali tysiačy specyjalistaŭ pracavali ŭ Alžyry, Mazambiku, na Kubie i inšych sajuźnikach savieckaj imperyi. Znaŭcy hišpanskaj movy buduć zapatrabavanyja.
Ale jak nadoŭha?
Paraza Čavesa na referendumie 3 śniežnia ŭraz pastaviła pad sumnieŭ jahonuju ŭładu i adnačasova jahonyja zamiežnapalityčnyja prajekty, kštałtu supracy ź Biełaruśsiu. Apazycyja adkryta nazyvaje ich varjactvam, zadavalnieńniem ułasnych ambicyjaŭ.
Šyrokaja hramadzkaja kaalicyja — kaścioł, apazycyjnyja partyi, biznes, studenctva — zdoleła dabicca niemahčymaha, pravalić čavesaŭski plan kanstytucyjnych źmienaŭ.
Pravał Čavesa moža mieć tyja samyja nastupstvy, što i paraza Pinačeta na takim ža nibyta zaviedama peŭnym referendumie 1988 hodu.
Za Čavesam haspadarka Venesueły dajšła da durnoha stanu, kali ŭ peryjad zavobłačnych cenaŭ na naftu, hałoŭnuju krynicu bahaćcia i adziny artykuł ekspartu, ekanamičny rost apuściŭsia da ścipłych parupracentavych pakazčykaŭ, a ŭ krainie pačaŭsia deficyt asnoŭnych praduktaŭ, naprykład, małaka.
Ekscentryčny Čaves u ekanamičnych pytańniach kirujecca palityčnymi metami: jon finansuje režym Kastra na Kubie, vyhaniaje adnych investaraŭ i zaprašaje inšych. Jamu zamanułasia zamianić zachodnija technalohii bratnimi kitajskimi i biełaruskimi.
Natchnionaja pieramohaj venesuelskaja apazycyja napeŭna pasprabuje raźvić pośpiech. Možna čakać u bližejšyja tydni mahutnych manifestacyj.
U vypadku padzieńnia Čavesa Biełarusi niama čaho raźličvać na darmovuju zdabyču nafty.
Słovy Łukašenki mohuć aznačać, što Biełaruś pasprabuje ŭpłyvać na chadu padziejaŭ u Karakasie.
Dahetul havorka išła tolki pra pastaŭku ŭzbrajeńniaŭ. A nu ž na pomač pryjduć jašče vajskovyja daradcy, raźviedka i AMON.