Mižnarodnyja ekśpierty pryznali biełaruskuju ŭładu vinavataj u hrupavym parušeńni pravoŭ žycharoŭ Homiela na vykazvańnie mierkavańnia i na praviadzieńnie mirnaha schodu. Adpaviednaje rašeńnie raźmieščana na sajcie AAN.
7 maja 2009 hoda, u 10-ju hadavinu źniknieńnia kiraŭnika MUS Juryja Zacharanki, pradstaŭniki abjadnanych demakratyčnych sił rehijona praviali pierad budynkam UUS Homielskaha abłvykankama akcyju, trymajučy fotazdymki źnikłaha hienierała. Usie jany byli pryciahnuty da bujnych štrafaŭ, a adzin z udzielnikaŭ — Uładzimir Kacora — da administracyjnaha aryštu. Nie znajšoŭšy ŭnutry krainy pravavoj abarony, aktyvisty paskardzilisia ŭ Kamitet pa pravach čałavieka AAN.
Jak paviedamiŭ kiraŭnik Homielskaha centra stratehičnaj ciažby Leanid Sudalenka, jaki dapamahaŭ aktyvistam abaranić pravy na mižnarodnym uzroŭni, upieršyniu Kamitet pa pravach čałavieka daŭ acenku rašeńniu homielskich uładaŭ ab paradku praviadzieńnia masavych mierapryjemstvaŭ u horadzie.
«Faktyčna homielskim čynoŭnikam u Ženievie pastaŭlena tłustaja dvojka. Im nahadali pra mižnarodnyja abaviazacielstvy krainy i pra toje, jak treba stavicca da pravoŭ i svabod hramadzian. Navat kali abmiežavańni, nakładzienyja za raspaŭsiudžvańnie infarmacyi ab źnikłym eks-kiraŭniku MUS z vykarystańniem mirnaha schodu, dazvoleny nacyjanalnym zakanadaŭstvam, biełaruskija ŭłady nie zmahli abhruntavać, jakuju niebiaśpieku stvaryli hramadzianie, vystaviŭšy na ŭsieahulny ahlad partrety źnikłaha eks-ministra ŭnutranych spraŭ», — prakamientavaŭ rašeńnie pravaabaronca.
Ciapier biełaruskija ŭłady abaviazany pierahledzieć hetuju spravu, pradać adpaviednyja kampiensacyi, u tym liku apłačanych štrafaŭ.
Urad Biełarusi abaviazany pryniać miery pa niedapuščeńni anałahičnych parušeńniaŭ u budučyni, a taksama pierahledzieć zakon ab masavych mierapryjemstvach i rašeńnie homielskich uładaŭ ab paradku praviadzieńnia mirnych schodaŭ u Homieli takim čynam, kab praktyka ich prymianieńnia nie pryvodziła ŭ budučyni da parušeńnia pravoŭ, harantavanych Mižnarodnym paktam ab hramadzianskich i palityčnych pravach.
Pryniataje rašeńnie ŭrad Biełarusi pavinien apublikavać, u tym liku i na biełaruskaj movie, u aficyjnych ŚMI i vykanać jaho na praciahu 180 dzion.
