«Prezydent Džordž Buš sustrakajecca ź siamiu liderami prademakratyčnych palityčnych partyjaŭ i niedziaržaŭnych arhanizacyjaŭ ź Biełarusi — apošniaj dyktatury ŭ Eŭropie» — hety podpis pad fotazdymkam vyklikaŭ krytyku aŭtara «Washington Post» Freda Hajata.
«Takaja sustreča sapraŭdy mieła miesca, — piša Hajat, — a voś fraza «apošniaja dyktatura ŭ Eŭropie» paśla niadaŭnich vybaraŭ u Rasiei hučyć vielmi niesučasna. Hadzińnik prezydenta Buša adstaŭ, a da jaho planaŭ nieści svabodu bolš surjozna pastavilisia vorahi svabody, čym aŭtary tych planaŭ».
Dalej hazeta pryvodzić vykazvańnie Alaksandra Milinkieviča:
«Ja pamiataju, jak zusim niadaŭna šerah eŭrapiejskich palityčnych dziejačaŭ kazali mnie, što abjadnacca z Rasiejaj dla nas było b dobra, bo tady my b pazbavilisia ad svajho dyktatara. Ale ciapier tak nichto nia kaža».
Na dumku Freda Hajata, Milinkievič i jaho spadarožniki ŭ Vašynhtonie majuć mała ahulnaha — heta kamunist, sacyjał‑demakrat, chryścijanski demakrat, a taksama ludzi inšych pohladaŭ. Jak tolki ŭ Biełarusi ŭstalujecca demakratyja, jany ŭčepiacca adzin adnamu ŭ horła ŭ baraćbie za ŭładu. Ale pakul što jany abjadnanyja ŭ pryhožaj baraćbie za demakratyju. Jany znachodziać drukarni, jakija tut ža začyniajucca ŭładami, jany drukujuć hazety, tyražy jakich chutka kanfiskujucca, ich sadziać u turmy, a kali jany adtul vychodziać, to pačynajuć dapamahać siemjam inšych źniavolenych.
Vitajučy biełaruskich apazycyjaneraŭ padčas hadzinnaj sustrečy ŭ čaćvier na minułym tydni prezydent Buš skazaŭ:
«Ja viedaju vašy prablemy, tamu nie kažycie mnie ab ich. Skažycie lepš, jak ja mahu dapamahčy vam vyrašyć vašy prablemy».
Na dumku aŭtara «Washington Post» Freda Hajata, kab administracyja Biełaha domu sapraŭdy razumieła prablemy biełaruskaj apazycyi, jana mahła b rabić značna bolej. Jana b, naprykład, zapłaciła b za arhanizacyju novaha spadarožnikavaha telebačańnia dla Biełarusi, a nia tolki za radyjoviaščańnie na karotkich chvalach. Jana b nie skaračała dapamohu demakratyi ŭ susiednich ź Biełaruśsiu Rasiei i Ŭkrainie abo inšych postsavieckich dziaržavach, dzie chutka moža sutyknucca z realnym antydemakratyčnym blokam.
