Dvoje z udzielnikaŭ sustrečy z presaj byli apranutyja ŭ ciopłyja švedry i kurtki. Aktyvist ruchu «Za volnaje raźvićcio pradprymalnictva» Alaksandar Taŭstyka, adzin z zajaŭnikaŭ akcyi, paviedamiŭ, što ŭvieś čas čakaje zatrymańnia, tamu i apranajecca pa «akreścinsku».
Pradprymalniki padsumavali vyniki ŭčorašniaj akcyi. U cełym arhanizatary zastalisia zadavolenyja: niesankcyjanavany mitynh sabraŭ šmat bolš udzielnikaŭ, čym raniejšyja akcyi pradprymalnikaŭ, dazvolenyja ŭładami.
Siabra rady kampanii «Za svabodnaje raźvićcio pradprymalnictva» Leŭ Marholin adznačyŭ, što na niedazvoleny ŭładami mitynh naviedalisia čynoŭniki, adkaznyja za padtrymku pradprymalnictva.
«Pryjšoŭ načalnik ŭpraŭleńnia pradprymalnictva kamitetu ekanomiki Mienharvykankamu Alaksandar Kalinoŭski, jaki pierad ludźmi na płoščy adkryta pryznaŭ — prablema isnuje».
Alaksandar Taŭstyka kazaŭ pra rezanans akcyi.
«Siońnia byŭ siužet na rasiejskaj słužbie Bi‑Bi‑Si, heta vielmi važna pierad vizytam Pucina ŭ Biełaruś».
Pradprymalniki vykazvali zdahadki, kamu usio ž vyhadna zadušeńnie drobnaha biznesu, pryvodzili prykłady biespadstaŭnaha zakryćcia haradzkich rynkaŭ. Sp. Taŭstyka raspavioŭ pra abstaviny jahonaha zatrymańnia ŭ «Padziemnym horadzie». Pa jaho słovach, adzin z uładalnikaŭ rynku prademanstravaŭ jamu rasiejski pašpart z maskoŭskaj prapiskaj i zajaviŭ, što jaho nie chvalujuć prablemy biełarusaŭ. Takaja ž sytuacyja i na niekatorych inšych rynkach.
Lidery pradprymalnikaŭ bieź iluzijaŭ staviacca da pieramovaŭ z uładami:
«Anatol Paŭłovič prademanstravaŭ, jak jon trymaje słova».
U vypadku, kali chtości z zatrymanych učora pradprymalnikaŭ nia zmoža ŭdzielničać u pieramovach, albo pieramovy hetyja buduć farmalnymi, ci sprobaj zaciahnuć čas, ź 1 studzienia pradprymalniki pačynajuć biesterminovy strajk:
«Pojdziem u adpačynak biaz vypłaty padatkaŭ».
Asnoŭnaje patrabavańnie pradprymalnikaŭ — raspracoŭka hruntoŭnaha zakonu ab pradprymalnickaj dziejnaści, jaki b dazvoliŭ im planavać svaju pracu ŭ doŭhaj perspektyvie. U karotkaj perspektyvie jany patrabujuć nieadkładnaha vyrašeńnia prablemy zvalnieńnia najomnych supracoŭnikaŭ.
«Pradprymalniki — heta ruchavik nacyi, i nas nielha raźmierkavać na pracu dvornikami ci prybiralščykami, jak prapanuje Kalinoŭski» — zaznačyli lidery pradprymalnikaŭ.
