Zbornik turemnaj prozy budzie prezientavany ŭ subotu 18 kastryčnika na Budzionaha.
«Čarviak» – zbornik turemnych apoviedaŭ, napisanych Źmicieram Daškievičam padčas adsidak z 2006 pa 2013 hady. Aŭtar «ad zvanka da zvanka» prajšoŭ šlach zeka — ad ščarbatych ścienaŭ KPZ (kamery papiaredniaha źniavoleńnia) da aledzianiełaha zimovaha karcaru ŭ turmie krytaha typu. Daškievič apisvaje realii biełaruskaj pienitecyjarnaj sistemy, a razam z tym i ludziej, jakija trapilisia jamu na šlachu.
«Toje, što napisaŭ Źmicier Daškievič u turmie, — kaža pra knihu Uładzimir Niaklajeŭ, — uražvaje jak žorstkaj praŭdaj žyćcia, hetak i naturalnaściu, ź jakoj aŭtar u niečałaviečych umovach u kožny momant zastajecca čałaviekam. U hetaj strymanaj prozie niama nijakaj pozy, nijakaj sproby samahieraizacyi – jość tolki praz asabisty dośvied, praz pakuty zajmietaje śćvierdžańnie: kali žyvie ŭ tabie Duch, kali nie pachisnułasia viera, ty zdolny pieratryvać niemahčymaje i adoleć nieadolnaje…»
Bolšaść tekstaŭ była napisana ŭ horackaj i hłybockaj kałonijach ciaham 2011-2013 hadoŭ, apovied «Čarviak» byŭ skončany ŭ haradzienskaj turmie. Daškievič – adzin ź lidaraŭ «Maładoha Frontu», z-za svajoj dziejnaści nieadnarazova byŭ pieraśledavany i traplaŭ za kraty. Apošni raz byŭ źniavoleny za niekalki dzion da prezidenckich vybaraŭ 2010 hodu, vyzvaleny ŭ žniŭni 2013 hodu. Ciapier pracuje cieślarom u Minsku, haduje dačku.
Prezientacyja adbudziecca ŭ subotu 18 kastryčnika pa adrasie Budzionaha 48B (nievialički damok pobač sa stajankaj kala Budzionaha 48A), pačatak u 19.00.
