Nafta marki Brent patańnieła ŭ chodzie handlovaj siesii 14 kastryčnika ŭ Jeŭropie na 3,85 dalara da 85,04 dalara za barel.
Tempy padzieńnia (4,3%) akazalisia samymi vysokimi ź vieraśnia 2011 hoda, adznačaje The Wall Street Journal.
Amierykanskaja naftu marki WTI patańnieła jašče macniej — na 4,6% da 81,84 dalara za barel, što stała maksimalnym padzieńniem amal za dva hady: ciapier cana znachodzicca na ŭzroŭni červienia 2012 hoda.
Abvał, jak adznačaje rasijskaja hazieta «Viedomosti», byŭ vyklikany apublikavanym u aŭtorak prahnozam Mižnarodnaha enierhietyčnaha ahienctva, jakoje źniziła prahnoz rostu popytu na naftu ŭ 2014 hodzie na 200 tysiač barelaŭ u sutki, da 92,4 miljona barelaŭ. Takim čynam, rost u paraŭnańni z 2013 hodam składzie tolki 700 tysiač barelaŭ — heta samyja nizkija tempy pryrostu popytu za apošnija piać hadoŭ.
Pry hetym rost zdabyčy ŭ paraŭnańni ź vieraśniem 2013 składzie 2,8 miljona barelaŭ u sutki, i dla skaračeńnia prapanovy abo pavieličeńnia rostu popytu spatrebicca dalejšaje padzieńnie cenaŭ na naftu, havoryć dakład.
Na padzieńnie ceny, na dumku analitykaŭ, akazaŭ upłyŭ taksama list saudaŭskaha prynca Al-Valida, jaki zaklikaŭ ministra nafty karaleŭstva nie dapuścić padzieńnia cenaŭ na paliva nižej ŭzroŭniu ŭ 80 dalaraŭ. Jak adznačajuć ekśpierty, zvarot prynca moh napałochać trejdaraŭ, bo jon śviedčyć ab tym, što kanflikty ŭ APIEK nie dazvolać krainam-eksparcioram damovicca ab kaardynacyi namahańniaŭ pa padtrymcy cenaŭ.
Aficyjny prahnoz Minekanamraźvićcia Rasii pa canie nafty na 2014 hod składaŭ 104 dalara za barel hatunku Urals. Pry bolšym padzieńni cany pasłableńnie rubla paskorycca, a ekanamičnaja aktyŭnaść źnizicca «až da admoŭnych tempaŭ rostu ekanomiki», prahnazujuć rasijskija ekanamisty.
