Moładź prydumała novaje słova: «vyšymajka». Heta majka z naniesienym na jaje arnamientam, jak na vyšyvancy. Vyšyvanaja kašula kaštuje doraha, na kožny dzień nie nakuplaješsia. A majki tannyja. A ŭsio adno pryhoža!
U Biełarusi ŭsio bolš ludziej ličać spravaj honaru mieć u svaim harderobie ci interjery rečy z nacyjanalnym kałarytam.
Źjaviłasia navat internet-krama symbal.by, što śpiecyjalizujecca na nacyjanalnych tavarach. U jaje asartymiencie jość jak chard-liniejka, z «Pahoniami», tak i soft-styl: z nacyjanalnym arnamientam.
A nazva — uzhadvajecie? — adsyłaje da kłasičnaha sanieta Maksima Bahdanoviča «Pamiž piaskoŭ Jehipieckaj ziamli…»
Voś symbal tvoj, zabyty kraju rodny,
Zvarušany narešcie duch narodny,
Ja vieruju, biaspłodna nie zaśnie…
Tak heta hučała ŭ aryhinale, kłasičnym pravapisam, u jakim słova «simvał» pisałasia jak «symbal».
Kramu zasnavaŭ 27-hadovy vychadziec ź Lidy, jaki vučyŭsia ŭ Breście, Pavał Biełavus — toj samy, jaki raniej stvaryŭ «Art-siadzibu».
Na sajcie pradajecca šmat čaho: ad upryhažeńniaŭ da vopratki.
«Kali čałaviek niešta atrymlivaje za tak, to tak da hetaha i stavicca. A kali kuplaje, to bieraže», — kaža Pavał Biełavus.
Krama sabrała na prodaž tavary roznych vytvorcaŭ i majstroŭ u adnym miescy.
Usio zroblenaje ŭ Biełarusi, a tamu i kaštuje, viadoma, trochi daražej, čym kitajskaje.
Na siońnia najbolšy popyt idzie na vyšymajki, kaža Biełavus. Ich pradali bolš za 1500 štuk. Rekardsmienam staŭ «Pryorbank», jaki nabyŭ adrazu 40 vyšymajek.
* * *
Čornaja mužčynskaja majka, zroblenaja ŭ stylistycy tradycyjnaj biełaruskaj vyšyvanki, sa 100% bavoŭny kaštuje 150 tys. Malunak na joj nanosicca pry dapamozie šaŭkahrafii. Dyzajn sakołki prydumaŭ Franak Viačorka.
Zavušnicy ručnoj raboty možna nabyć za 100 tysiač.
Tkany pojas ručnoj raboty kaštuje 120 tysiač.
Vokładki na dakumienty ŭ nacyjanalnym styli — ad 150 tysiač.
!!! Symbal.by z zadavalńniem prymie na prodaž lubyja vyraby ad narodnych majstroŭ i pradpryjemstvaŭ luboj formy ŭłasnaści.
