Siońnia ŭ Minsku pradstaŭniki biełaruskaj litaratury razam ź dziaržaŭnym instytutam adukacyi abmiarkoŭvali i šukali šlachi vyrašeńnia prablemy nizkaj kultury čytańnia biełarusaŭ i niezacikaŭlenaści biełaruskaj litaraturaj.
Heta toj redki vypadak, kali dva baki barykad abjadnalisia dla vyrašeńnia ahulnaj prablemy.
Kruhły stoł prajšoŭ pa vynikach aksijamietryčnych daśledvańniaŭ «Novak» pa zamovie HA «Sajuz biełaruskich piśmieńnikaŭ». Było apytana 1000 respandentaŭ roznych uzrostaŭ i z roznych rehijonaŭ Respubliki Biełaruś. Pa vynikach apytańnia ahulnaja karcina kultury čytańnia biełarusaŭ vyklikaje surjoznuju zaniepakojenaść.
Niahledziačy na toje, što ahułam biełarusy pačali čytać bolš, značna źniziłaś kolkaść ludziej, jakija čytajuć na biełaruskaj movie. Kali ŭ 2011 hodzie ich było kala 14%, u 2014 kolkaść źniziłasia da 5%. 70% biełarusaŭ nie viedaje nivodnaha sučasnaha biełaruskaha piśmieńnika.
Što tyčycca vybaru zamiežnych aŭtaraŭ, to tut lidzirujuć Puškin i Dancova.
Pry hetym biełarusy ličać, što asnoŭnym faktaram farmiravańnia kultury čytańnia stanovicca nie siamja i asiarodździe, a pieradusim škoła. Situacyja ŭ škole, dzie zamiežnaja mova maje bolš hadzin za biełaruskuju, viadoma ŭsim. Cikavy jašče toj fakt, što biełaruskamoŭnyja ludzi čytajuć značna bolš za ruskamoŭnych.
Najaŭnaść prablemy była pryznanaja ŭsimi, i ŭ vyniku kruhłaha stała byli sfarmiravanyja prapanovy, jakija musiać źmianić situacyju ŭ śfiery litaratury. Dziŭna i pryjemna było bačyć kałarytnych žančyn ź dziaržaŭnych ustanoŭ, jakija surjozna i abdumana stavilisia da kožnaha ŭźniataha pytańnia. Pa-dziaržaŭnamu tak, aficyjna.
Ahulnymi namahańniami byŭ składzieny zvarot u Ministerstva kultury, adukacyi i infarmacyi Biełarusi.
U im prapanoŭvajecca pavialičyć kolkaść hadzin biełaruskaj movy i litaratury ŭ škole. Pierahladzieć školnyja i univiersiteckija prahramy i zrabić ich bolš aktualnymi i cikavymi dla navučencaŭ-čytačoŭ. Heta tyčycca i stvareńnia biełaruskamoŭnych sadkoŭ i himnazij. Prapanoŭvajecca taksama zadumacca pra stvareńnie całkam biełaruskamoŭnaj navučalnaj ustanovy. Nie mienš istotnym źjaŭlajecca zabieśpiačeńnie piśmieńnikam, niezaležna ad siabroŭstva ŭ tvorčych arhanizacyjach, roŭny dostup da praviadzieńnia sustreč z čytačami ŭ navučalnych ustanovach. I heta tolki maleńkaja častka z ahulnaha śpisu.
Sustreča była karysnaja tym, što kali litaratary i pradstaŭniki kulturnaj śfiery dobra mohuć farmavać idei i prapanovy, to dziaržaŭny siektar paśpiachova dapamahaje razabracca va ŭsich jurydyčnych i praktyčnych momantach. Zakony i biurakratyju jašče nichto nie admianiaŭ.
Sami ž biełarusy, zhodna z apytankaj, bačać šlachi papularyzacyi biełaruskaj litaratury praz pavieličeńnie kolkaści hadzin u navučalnych ustanovach i nieabchodnaści bolšaj žanravaj raznastajnaści tvoraŭ.
Što tyčycca rekłamy i infarmacyi, to na ich pohlad, adkaznaść za znajomstva čytačoŭ z našymi piśmieńnikami lažyć na našych ŚMI.
