Častku našaje publiki ŭschvalavała ŭčorašniaja zajava Łukašenki pra hatovaść padtrymać Rasieju ŭ pytańni pra raźmiaščeńnie elementaŭ amerykanskaj supraćrakietnaj abarony. Siońniašniuju presavuju kanferencyju načalnika rasiejskaha hienštabu Bałujeŭskaha z zakidami ŭ bok Vašynhtonu chto-kolviek paličyŭ pramym nastupstvam pieramovaŭ u Miensku.
Ale "paśla niečaha" nie abaviazkova aznačaje "ŭ vyniku niečaha".
U Rasiei — svaja pieradvybarnaja "hulnia ŭ vajnu". Značnaj častcy tamtejšaha elektaratu padabajecca, kali palityki i hienerały verbalna "dajuć pa rahach amerykosam".
Bałujeŭski, zdajecca, nivodnaha razu i nie zhadaŭ pra Biełaruś. Praŭda, na hetuju temu paśpieŭ užo vykazacca adstaŭny "iastrab" hienerał Ivašoŭ. Jon pa punktach vykłaŭ prahramu metadyčnaha ŭciahvańnia našaje krainy ŭ novuju chałodnuju vajnu. Chaj, maŭlaŭ, biełaruskija braty nakładuć… u sensie — maratoryj :) — na damovy z praklatymi buržuinami i raźviažuć nam ruki dla adekvatnaha adkazu.
Hienerał maryć, kab Biełaruś naceliła svaju bajavuju avijacyju na abjekty amerykanskaj supraćrakietnaj abarony ŭ Polščy dy Čechii, puściła siudy "rasiejskija ŭdarnyja dy abaronnyja srodki", a kali sprava zojdzie daloka — prapanuje nam pastavić pytańnie ab vychadzie ź Lisabonskaha pratakołu dy adkryć šlach da raźmiaščeńnia jadravaj zbroi.
Zaraz, tavaryš hienerał, tolki štany padciahniem!
Tre' było bačyć učora pa televizii, jak dziažurna, bieź impetu kazaŭ Alaksandar Łukašenka na temu supraćrakietnaj abarony. Viały pijaraŭski pas za paŭtara miljardy kredytu.
Projduć vybary ŭ Rasiei — i tam impet zhaśnie (chacia ŭvohule vialikadziaržaŭnaja rytoryka zastaniecca na ŭzbrajeńni). Ciapierašniaja rasiejskaja elita z rachunkami ŭ zachodnich bankach nikoli nia zhodzicca mianiać bankietnyja fraki na šyniali chałodnaje vajny. Aficyjnamu Miensku taksama niedarečy abvastrać stasunki z Eŭropaj.
Dyj, u rešcie reštaŭ, ci takija nierazvažlivyja ŭ Kramli stratehi, kab davać u ruki susiedu jadravuju zbroju?
Tut i bieź jaje ź ciažkaściu damaŭlajucca pra elementarnyja rečy. Tak, vidavočna, što adnoj z metaŭ vizytu Pucina było harantavańnie bieśpierabojnych pastavak enerhanośbitaŭ u Eŭropu. U vyniku Łukašenka publična zajaviŭ pra adkaznaść za heta, nie zabyŭšy padkreślić, što Eŭropa musić być nadta ŭdziačnaja.
Voś toje, što siońnia pradstaŭnik "Hazpromu" paabiacaŭ nam haz pa $119 u pieršym kvartale novaha hodu, — akurat i moža być nastupstvam vizytu Pucina. Maleńki piernik. Zaŭvažcie, darečy, hetaje maskoŭskaje noŭ-chaŭ: ciapier možna stavić na vušy štokvartalna!
ZY. Jak zaŭždy, z vytančanaj źjedlivaściu piša pra pieramovy ŭ Miensku Andrej Kaleśnikaŭ u "Kommiersantie". Dla amataraŭ žanru: artykuł lažyć vo tutaka.
