U bai važnaja kožnaja siekunda i stračanaje imhnieńnie moža pryvieści da hibieli. Tamu dla stvaralnikaŭ zbroi dahetul zastajecca prablemaj toje, što navat samyja sučasnyja aptyčnyja pryceły dla źmieny naładak patrabujuć zdymać palec z kurka ci advodzić voka ad celi.
Sandia National Laboratories raspracavali pryceł Rapid Adaptive Zoom for Assault Rifles (RAZAR) — sistemu chutkaha adaptyŭnaha zumu dla šturmavych vintovak, jakaja dazvalaje pieraklučacca pamiž bolšym i mienšym pavieličeńniem siekundnym naciskam knopki.
Sistema zasnavanaja na pryncypach dziejańnia čałaviečaha voka: u adroźnieńnie ad ad kłasičnych prycełaŭ, u jakich linzy dla źmieny zumu ruchajucca ŭzdoŭž vosi prycełu, adaptyŭnaje pavieličeńnie kantralujecca źmienaj kryvizny nieruchomych linzaŭ. Dla hetaha vykarystoŭvajecca pjezaelektryčny pryvad, jaki vyhinaje hnutkija palimiernyja linzy z chutkaściu 250 milisiekund i dakładnaściu 100 nanamietraŭ.
Heta dazvalaje prycełu być kampaktnym, lohkim i ŭniviersalnym, pry hetym vykarystoŭvajučy vielmi niašmat elektraenerhii. Jon užo prachodzić vyprabavańni ŭ Siłach specyjałnych apieracyj ZŠA.
Demanstracyjnaje videa Sandia National Laboratories
Technałohija RAZAR, jak ličać raspracoŭščyki, budzie karysnaj taksama dla novaj miedyčnaj techniki, binoklaŭ, videakamier, mabilnych telefonaŭ. Ciapier idzie praca nad takim prycełam načnoha bačańnia.
