Mižnarodny valutny fond hatovy abmiarkoŭvać ź Biełaruśsiu novuju kredytnuju prahramu ŭ vypadku hatoŭnaści ŭrada na rašučyja zachady pa refarmavańni ekanomiki.
Takuju zajavu zrabiŭ siońnia padčas pres-kanfierencyi ŭ Minsku kiraŭnik misii MVF u Biełarusi Devid Chofman.Misija MVF pracavała ŭ Minsku z 22 pa 28 kastryčnika. Jak adznačyŭ Chofman, metaj vizitu było abmierkavańnie ź biełaruskim bokam ekanamičnaj palityki, što pravodzicca ŭ krainie, i płanaŭ na budučyniu.
Da hetaha času, kanstatavaŭ Chofman, urad uchvaliŭ płan sistemnych mier pa zbałansavanym raźvićci ekanomiki. Pavodle jaho słoŭ, MVF vitaje ekanamičnyja płany ŭrada. «Ale nieabchodna prapanavać dadatkovyja miery, kab vypracavać kompleksny dakumient, jaki b byŭ padtrymany fondam», — skazaŭ kiraŭnik misii.
Jon udakładniŭ, što MVF čakaje ad Minska rašučych zachadaŭ pa refarmavańni ekanomiki: «Kali ŭłady hatovyja prapanavać rašučyja miery ŭ halinie ekanamičnaj palityki, to fond hatovy abmiarkoŭvać novuju prahramu ź Biełaruśsiu».
Na pytańnie ab kankretnych prapanovach fondu Chofman adkazaŭ, što «kankretnyja punkty nie budzie karysnym ciapier abmiarkoŭvać publična». Pry hetym jon daŭ zrazumieć, u jakich śfierach MVF čakaje źmianieńniaŭ. «Kankretnyja zachady my chacieli b bačyć u śfiery hrašova-kredytnaj palityki, kursaŭtvareńni, palitycy zarpłat, dyrektyŭnym kredytavańni ekanomiki», — skazaŭ kiraŭnik misii.
Jon taksama ŭdakładniŭ, što fond vystupaje za skaračeńnie abjomu finansavańnia dziaržprahram. Pavodle mierkavańnia MVF, dadaŭ Chofman, padrychtavany ŭradam Biełarusi płan utrymlivaje peŭnyja nieabchodnyja mierapryjemstvy. «U pryvatnaści, misija rašuča padtrymlivaje namiery ŭład likvidavać pierakryžavanaje subsidavańnie i pavialičyć asobnyja taryfy na žyllova-kamunalnyja pasłuhi i transpart da ŭzroŭniu pakryćcia zatrat da 2017 hoda. Choć takija zachady pavinny nasić kompleksny charaktar, pryčym asnoŭnyja namahańni varta zasiarodzić na pačatkovym etapie», — padkreśliŭ Chofman.
Adnak, dadaŭ jon, biez uklučeńnia va ŭradavy płan inšych mier dakumient nie zmoža značna paŭpłyvać na stan biełaruskaj ekanomiki. «Uličvajučy ŭsio vyšejskazanaje, biez uklučeńnia ŭ płan bolš šyrokaha śpiektra strukturnych reform i rašučych mier u častcy makraekanamičnaj palityki małavierahodna, što jon budzie spryjać značnamu skaračeńniu dysbałansaŭ i ŭmacavańniu pierśpiektyŭ rostu», — skazaŭ kiraŭnik misii MVF u Biełarusi.
