Unikalny albom-katałoh «Knižnaja spadčyna Biełarusi» pradstaŭleny 28 kastryčnika ŭ halerei «Łabirynt» Nacyjanalnaj biblijateki Biełarusi (NBB) u Minsku.
Vydańnie hetaha alboma-katałoha prymierkavanaje da 500-hodździa biełaruskaha knihadrukavańnia. Prajekt «Knižnaja spadčyna Biełarusi» padrychtavany vydaviectvam «Biełaruskaja Encykłapiedyja imia Pietrusia Broŭki» sumiesna z NBB pa zamovie i pry finansavaj padtrymcy Ministerstva infarmacyi Biełarusi. U albomie sabranyja važniejšyja ŭzory nacyjanalnaj knižnaj spadčyny z fondaŭ biblijateki: rukapisnyja i staradrukavanyja knihi, a taksama vydańni, pryśviečanyja biełaruskaj tematycy, redkija i kaštoŭnyja knihi, kartahrafičnyja i vyjaŭlenčyja vydańni, knihi ź viadomych biełaruskich zboraŭ. Usiaho ŭ katałohu bolš za 400 staronak tekstaŭ i tysiačy ilustracyj. Vydańnie vykanana na biełaruskaj, ruskaj i anhlijskim movach.
Na prezientacyi knihi namieśnik dyrektara NBB pa navukovaj pracy, viadučy ŭkładalnik katałoha Aleś Suša zaznačyŭ, što «napiaredadni 500-hodździa biełaruskaha knihavydaviectva hety albom bačycca nadzvyčaj aktualnym». Pavodle jaho słoŭ, vydańnie atrymałasia svajho rodu «daviednikam pa śviecie biełaruskaj knihi», bo jano daje mahčymaść «pakazać toje bahaćcie i raznastajnaść knižnaj spadčyny, jakoje atrymałasia zachavać». «Upeŭnieny, što nieŭzabavie źjavicca druhoje vydańnie hetaj knihi, tamu što ŭ nas zastalisia peŭnyja napracoŭki, jakija ciapier my nie zmahli ŭ poŭnym abjomie pakazać, naprykład spadčyna pieryjadyčnych vydańniaŭ i mnohaje inšaje», — skazaŭ namieśnik dyrektara biblijateki.
«Pryjemna, što siońnia ŭ nas jość takoje vydańnie, — adznačyŭ Suša. — Chaj nie ŭsie našy čakańni apraŭdalisia, ale kniha atrymałasia hodnaj i ŭ płanie palihrafičnaha vykanańnia, i ŭ płanie padboru materyjału. U joj utrymlivajucca teksty z roznych pomnikaŭ knihavydaviectva: rukapisnych i drukavanych, staražytnych i adnosna sučasnych. Razam my zmahli pakazać bahaćcie knižnaj spadčyny Biełarusi».
U svaju čarhu hałoŭny redaktar «Biełaruskaj Encykłapiedyi imia Pietrusia Broŭki» Łarysa Jazykovič nahadała, što hety prajekt praciahvaje tradycyju supracoŭnictva vydaviectva z Nacyjanalnaj biblijatekaj Biełarusi. Upieršyniu kniha była pradstaŭlenaja ŭ kancy žniŭnia hetaha hoda na śviatkavańni Dnia biełaruskaha piśmienstva ŭ Zasłaŭi, adnak, pavodle jaje słoŭ, užo ciapier vydańnie «stała rarytetam».
«Nakład byŭ usiaho adna tysiača asobnikaŭ, 800 ź jakich vykupiła Ministerstva infarmacyi, — raskazała hałoŭny redaktar vydaviectva. — Asobniki knihi jak sacyjalna značnaha vydańnia raspaŭsiudžvajucca pa biblijatekach Biełarusi, adździełach kultury i moładzi rajvykankamaŭ, pramysłovych pradpryjemstvach. Robicca heta dla taho, kab našy skarby, jak kažuć, išli ŭ narod».
Jazykovič taksama nie vyklučyła, što ŭ bližejšyja hady «Knižnaja spadčyna Biełarusi» budzie dapoŭnienaja i pieravydadzienaja.
