Paśla dźviuch «vilenskich», «varšaŭskaha», «hdańskaha» i «starachovickaha» peryjadaŭ dziejnaści za miežami krainy Biełaruski Licej dva tydni pracavaŭ u Francyi.
Pa darozie Licej naviedaŭ starych siabroŭ z himnazii imia H.Kielera ŭ zachodniaj častcy Berlinu (kantakty byli naviazanyja ŭ pieršaj pałovie 1990-ch). Liceisty pašpacyravali pa viečarovym horadzie, sfatahrafavalisia la Brandenburskaje bramy, kolišniaha rajchstahu, na vulicy Unter-den-Linden.
U Francyi liceistaŭ, vykładčykaŭ i doktarku (maci adnaho z navučencaŭ) prytuliŭ haradok u Centralnym masivie pad nazovam Arek-na-Luary. Navučency mieli mažlivaść naviedvać zaniatki, jakija prachodzili ŭ sapraŭdnym zamku – kolišniaj rezydencyi baronaŭ Šazurnaŭ, karystacca vialikaj spartovaj zalaj i štodnia vypraŭlacca na špacyr u harach. Tym razam vučoby było nie zašmat, bo niekalki dzion było achviaravana na vyjezdy ŭ aŭtobusnyja vandroŭki – u Lijon ź jaho ŭnikalnymi pomnikami antyčnaści j siaredniaviečča, u zamak Palińjak i bahaty na siaredniaviečnuju architekturu horad Lo-Piui. U Lo-Piui biełaruskich liceistaŭ pad bieł-čyrvona-biełym ściaham vitała kiraŭnictva Hieneralnaje rady departamentu Vierchniaje Luary razam z senataram Huteronam. Na zakančeńnie vandroŭki liceisty razam z vykładčykami naviedali nabaženstva ŭ paryskim Notr-Damie, vystavu sučasnaha mastactva ŭ Centry Pampidu, padnialisia na Ejfelevu viežu.
Paśla peŭnych pryhodaŭ u darozie (pałamaŭsia adzin z aŭtobusaŭ) Biełaruski Licej viarnuŭsia na baćkaŭščynu, pryviozšy z saboju suveniry, pamiž inšaha, dla tych baćkoŭ, što ŭ vyniku padziejaŭ 19–25 sakavika adbyvali sutki ŭ akreścinskaj viaźnicy.
Vizyt liceistaŭ u Francyju adbyŭsia dziakujučy padtrymcy Fundacyi imia Rabera Šumana j inšych dabradziejaŭ pry spryjańni Ministerstva kultury Francyi j ambasady hetaj krainy ŭ Miensku.
Poŭnyja ŭražańniaŭ ad pajezdki, liceisty viarnulisia da zaniatkaŭ na radzimie. Ciarier jany razvažajuć nad zaprašeńniami, jakija pastupili ź inšych eŭrapiejskich krainaŭ.
Miž inšaha, Licej šukaje novych siabroŭ i ŭ Biełarusi, zaprašajučy dałučycca tych baćkoŭ i dziaciej, što ŭ nastupnym navučalnym hodzie majuć pierajści ŭ 8-ja–10-ja klasy siaredniaje škoły. Nieabchodnyja kantakty možna znajści praz redakcyju «Našaj Nivy».
ŁB, Berlin–Arek-na-Luary–Lijon–Lo-Piui–Paryž–Miensk
