Piaciora ŭdzielnikaŭ haładoŭki i dvoje žurnalistaŭ byli zatrymanyja milicyjaj u Babrujsku.
Pra heta paviedamiŭ staršynia arhanizacyi Svabodnaha prafsajuza Biełaruskaha (SPB) Babrujskaha zavoda traktarnych detalaŭ i ahrehataŭ (BZTDiA) Michaił Kavalkoŭ.
«Zatrymali siemiarych čałaviek — čaćviarych, što pravodzili haładoŭku, mianie i dvuch žurnalistaŭ, — skazaŭ jon pa telefonie. — My jechali da zavoda, kali nas spynili. Milicyja zabrała našu mašynu, dakumienty i viazuć nas va UUS».
Pa słovach Kavalkova, pryčyny zatrymańnia im nie patłumačyli. «U vypadku sa mnoj paličyli, što paśviedčańnie kiroŭcy — heta nie dakumient, patrebien pašpart. Ale ŭ astatnich byli pašparty, i ich zabrali biez tłumačeńnia pryčyn», — adznačyŭ jon.
Paźniej usich adpuścili, papiaredziŭšy ab administracyjnaj adkaznaści za ŭdzieł u niesankcyjanavanaj akcyi.
Pavodle słoŭ Mikałaja Žybula, čatyroch udzielnikaŭ haładoŭki, a taksama staršyniu arhanizacyi Svabodnaha prafsajuza Biełaruskaha (SPB) Babrujskaha zavoda traktarnych detalej i ahrehataŭ (BZTDiA) Michaiła Kavalkova i dvuch žurnalistaŭ «hadzinu-paŭtary pratrymali ŭ milicyi».
«Z nami praviali prafiłaktyčnuju hutarku, rastłumačyli, čym pahražaje ŭdzieł u niesankcyjanavanaj akcyi, — raskazaŭ Žybul. — Skazali, što kali pra našu haładoŭku prajšła infarmacyja ŭ internecie, jana ličycca niesankcyjanavanaj akcyjaj. Papiaredzili, što kali pradoŭžym haładoŭku, nas majuć prava aštrafavać na sumu da 30 bazavych vieličyń».
Pavodle słoŭ Žybula, ciapier jon i jaho tavaryšy vyrašajuć, ci buduć jany praciahvać haładoŭku pratestu. «Štraf u 30 bazavych vieličyń — heta vielmi značnaja suma dla nas», — skazaŭ jon.
Zvolnienyja z zavoda členy SPB Mikałaj Žybul, Aleh Šaŭčenka, Alaksandr Varonkin i Alaksandr Hramyka 5 listapada abviaścili haładoŭku ŭ budynku Babrujskaha harvykankama, patrabujučy zachavańnia ich kanstytucyjnaha prava na pracu. Im dvojčy davodziłasia pakidać budynak pa patrabavańni milicyi i čynoŭnikaŭ. 6 listapada čaćviora haładoŭnikaŭ praciahnuli akcyju pratestu niedaloka ad prachadnoj BZTDiA. Na vychodnyja jany spyniali haładoŭku i adnavili jaje 10 listapada.
