Inžyniery BMW rychtujuć hadžet, jaki moža stać sapraŭdnym technałahičnym praryvam u spravie raspaŭsiudu elektramabilaŭ.
Razmova idzie pra kampaktnuju zaradnuju pryładu, jakaja budzie ŭstaloŭvacca na haradskija śviatłafory. Pieršyja ekśpierymientalnyja ŭstanoŭki źjaviacca ŭ Miunchienie ŭžo ŭ nastupnym hodzie.
Člen rady dyrektaraŭ BMW Pieter Švarcenbaŭer skazaŭ: «Jak my chočam bačyć bolej elektramabilaŭ na darohach u bližejšyja hady, zručnaja sistema zaradnych stancyj źjaŭlajecca nieabchodnaj umovaj». Viadoma, kampanija, što vypuściła na rynak elektryčny i3 i płahin-hibrydny i8, vielmi zacikaŭlena ŭ zručnaści dla svaich klijentaŭ; tym nie mienš, «śviatłafornyja» elektraAZS buduć padychodzić dla luboha elektramabila niezaležna ad jaho marki.
Miarkujecca, što za spažytuju enierhiju ŭładalniki mašyn zmohuć płacić praz SMS, a dla pošuku bližejšaj zaradki možna budzie vykarystoŭvać mabilnaje prykładańnie. Ideja BMW padajecca vielmi zrazumiełaj: sapraŭdy, śviatłafory jość na luboj vulicy, da taho ž da ich užo padviedziena elektryčnaść. Dadać zaradny kabiel i praduhledzieć pobač adno-dva parkovačnyja miescy tańniej, čymsia budavać zapraŭkaŭ z nula.
Adnak dadamo, što dolu rynku elektramabilaŭ pakul zastajecca niaznačnaj. Pa słovach dyrektara pa daśledvańniach Navigant Research Džona Hartniera, prodažy elektramabilaŭ i hibrydaŭ dasiahnuć da 2020 hodu 3,3 młn. štuk na hod, adnak heta budzie tolki 3,3% ad suśvietnaha rynku aŭtaprama.
