«Zaprašajem u novy piachotny bataljon Sił abarony Izraila — da «Lvoŭ Iardana»… Žančyny ŭ im buduć treniravacca razam z mužčynami. Pastaŭcie łajk, kab pažadać im udačy!» — napisała pres-słužba izrailskaj armii na svajoj staroncy ŭ Facebook.
Novy bataljon lohkaj piachoty budzie abaraniać miažu Izraila ź Iardanijaj, jakaja ŭžo doŭhi čas ličycca mirnaj.
«Na miažy stabilna, jak i ŭ Karaleŭstvie (Iardanii), jak ja razumieju. U toj ž čas, my nie možam nie źviartać uvahu na tyja składanaści, ź jakimi sutykajecca Karaleŭstva Iardanii, na pahrozy (dla jaho) z poŭnačy i poŭdnia. Siły abarony Izraila musiać być hatovymi… My pavinny padrychtavacca da mahčymych pieramienaŭ», — adznačyŭ pałkoŭnik Ofir Livijus.
Dźvie traciny 18-hadovych izrailcianak prachodziać terminovuju vajskovuju słužbu.
Čakajecca, što bataljon budzie całkam sfarmiravany da kanca 2016 hoda — usie žaŭniery buduć razam treniravacca vyžyvać i vieści bai ŭ ciažkich umovach pustyni, kamuflavacca na amal hołaj ziamli, źbirać vyviednyja dadzienyja. Pierad hetym specyjalnym kursam jany projduć bazavuju padrychtoŭku na bazie izrailskaj desantnaj bryhady.
Zvyčajna žančyny i mužčyny ŭ izrailskaj armii słužać u roznych adzinkach, pryčym žančyny vykonvajuć dapamožnyja, a nie bajavyja funkcyi. Tolki ŭ adnym izrailskim bataljonie — bataljonie «Karakał» — žančyny słužać naroŭni z mužčynami i vykonvajuć bajavyja zadańni, ale tam bajcoŭ-mužčyn nie bolej za 30%. U novym bataljonie, jak płanujecca, žaŭnieraŭ abodvuch pałoŭ budzie prykładna roŭnaja kolkaść.
Dziaŭčyna z bataljona «Karakał».
Pastupovaja intehracyja žančyn u bajavyja častki izrailskaj armii źviazanaja nie tolki z palityčnym pytańniem roŭnaści pałoŭ, ale i z tym, što Izrailu davodzicca naroščvać kolkasny patencyjał Uzbrojenych siłaŭ na fonie rostu isłamisckaj pahrozy.
U Biełarusi ŭ armiju tradycyjny pryzyvajuć tolki mužčyn.
U ZŠA žančyny majuć mahčymaść słužyć naroŭni z mužčynami, ale pa-raniejšamu ŭ armii ich mienšaść.
Dałučajuć žančyn da abaronnaj spravy i niekatoryja jeŭrapiejskija krainy, naprykład, Narviehija.
