Kłaus Jochanis — novy prezident Rumynii.
U baraćbie za pasadu prezidenta Rumynii ŭ druhim tury vybaraŭ 55-hadovy mer horada Sibiu, pravacentryst Kłaŭs Jochanis maje vidavočnuju pieravahu nad svaim supiernikam.
Pra heta śviedčać apublikavanyja źviestki Centralnaha vybarčaha biuro (CIEB).
Paśla apracoŭki 33% biuleteniaŭ Jochanis nabiraje 55,79% hałasoŭ, a jaho supiernik — premjer-ministr, lidar kirujučaj Sacyjał-demakratyčnaj partyi Viktar Ponta — 44,2%, paviedamlaje TASS.
Jaŭka ŭ druhim tury vybaraŭ była rekordna vysokaj — 62,04%. Heta na dziesiać adsotkaŭ bolš, čym u pieršym tury 2 listapada.
Ponta, nie čakajučy aficyjnaj infarmacyi biuro pryznaŭ svaju parazu, pavinšavaŭšy Jochanisa ź pieramohaj.
«U nas demakratyčnaja kraina, — skazaŭ Ponta. — Narod zaŭsiody maje racyju».
Jochanis, 55-hadovy mer transilvanskaha horada Sibiu i etničny niemiec, abiacaŭ vybarščykam zmahacca z karupcyjaj i ŭmacavać niezaležnaść rumynskaj sudovaj sistemy.
Rumyny składajuć kala 89% nasielnictva Rumynii. Vienhraŭ naličvajecca kala 7%, niemcaŭ — mienš za 1%. Da 1989 hoda niemcy byli treciaj pa pamiery etničnaj hrupaj Rumynii. Jany žyli ŭ šmatetničnaj Transilvanii. Adnak z adkryćciom miežaŭ bolšaść ich źjechała ŭ FRH. Siarod tych, chto źjechaŭ, — adna z samych znakamitych rumynskich niemak, łaŭreatka Nobieleŭskaj premii ŭ halinie litaratury Hierta Miuler.
Karespandenty Bi-bi-si adznačajuć, što vynik vybaraŭ mahli vyrašyć hałasy vielizarnaj rumynskaj dyjaspary.
Mnohija z 4 miljonaŭ hramadzian Rumynii, jakija žyvuć za miažoj, byli niezadavolenyja premjeram. Ponta — palityk levaha tołku, a jahonaja palityčnaja siła ŭ bolšaj stupieni źviazanaja z Rasijaj.
Trajan Besesku, jaki zajmaŭ pasadu prezidenta dva terminy, pakidaje pasadu. Rumynija — adna z najbiadniejšych krain ES, niahladziečy na nievialiki ekanamičny rost (dziakujučy premjeru Pontu) apošnija hady, u krainie zachoŭvajecca vialiki ŭzrovień karupcyi.
U pieršym tury za Pontu prahałasavali 40%, za Jochanisa — 30%, i ekzit-poły addavali pieravahu Pontu.
Pieramoha Jochanisa — prajava źmienaŭ u śviadomaści rumynaŭ, umacavańnia hramadzianskaha, a nie etničnaha jaje kampanienta.