Barysaŭski BATE pravioŭ apošniuju chatniuju hulniu ŭ hrupavym etapie Lihi čempijonaŭ. U hości na maroznuju «Barysaŭ-Arenu» zavitaŭ čempijon Partuhalii kłub «Portu».
Vieraśnioŭskaje spatkańnie hetych kamand skončyłasia dla biełarusaŭ fijaska — 0:6. Paśla BATE zdabyŭ minimalnuju pieramohu nad ispanskim «Atletykam». A dva apošnija matčy byli poŭnaj katastrofaj — 0:7 i 0:5 ad danieckaha «Šachciora». Jasna, što ŭ takoj situacyi novaśpiečany 11-razovy čempijon Biełarusi chacieŭ na raźvitańnie paradavać zaŭziataraŭ.
U BATE praz traŭmy nie zmahli vyjści ŭ asnovie para centralnych abaroncaŭ — Jahor Filipienka i Dzianis Palakoŭ.
Heta ludzi, jakija na praciahu siezonu cemientavali tyły barysaŭskaha kłuba. Zamiest ich u asnovie źjavilisia mienš abkatanyja Vital Hajdučyk (toj samy, jaki niadaŭna rekłamavaŭ tvory Vasil Bykava) i sierb Niemańja Tubič. U astatnim skład BATE byŭ davoli pradkazalny.
Džeksan Marciniez — aŭtar druhoha hoła ŭ varoty BATE.
Pieršy tajm pakinuŭ spadziavańni na dobraje skančeńnie hulni. Choć BATE i nie stvaryŭ realnych momantaŭ la varot supiernikaŭ, ale skłałasia ŭražańnie, što «Portu» ŭ atacy vyhladaŭ jašče bolš biazzuba.
Uvohule ŭtvaryłasia paradaksalnaja situacyja, što abiedźvie kamandy za pieršuju pałovu hulni nie zmahli nanieści ŭ stvor nivodnaha ŭdara.
A voś u druhim tajmie pieršy ž udar u stvor staŭ rakavym. Na podstupach da štrafnoj pamyliŭsia Alaksandr Karnicki. I mieksikaniec Viktar Erera (jon byŭ u Barysavie i tydzień tamu padčas hulniaŭ zbornych) niejak nadzvyčaj lohka i ŭdała trapiŭ u daloki kut ad Černika. Było heta na 56-aj chvilinie hulni.
Jasna, što ŭ takim stanoviščy barysaŭcam tolki i zastavałasia, što biehčy napierad dy ahalać svaje tyły. Na 65-aj chvilinie jašče adzin pradstaŭnik Łacinskaj Amieryki kałumbijec Džeksan Marcines padvoiŭ pieravahu partuhalskaha kłuba.
Pierad hetym hulcy «Portu» bieśpieraškodna vałodali miačom u štrafnoj BATE i rabili adnu za druhoj dakładnyja pieradačy. Kali zabivaŭsia druhi hoł, to fan-siektar, jakoha nibyta nie było, a nibyta byŭ, śpiavaŭ: «Što mnie śnieh, što mnie doždž, kali maje druźja sa mnoj».
Alaksandr Jermakovič imknuŭsia ŭzbadzioryć hulniu vychadam Dźmitryja Bahi dy Mikałaja Sihnieviča, adnak u apošni momant našym hulcam nie chapała dakładnaj pieradačy.
A ŭžo na 87-aj chvilinie Krystyjan Teljo pastaviŭ kropku ŭ hetaj hulni. Na žal, BATE znoŭ nie atrymałasia paźbiehnuć bujnoj parazy.
Apošniuju hulniu BATE praviadzie 10 śniežnia ŭ Bilbaa suprać miascovaha «Atletyka». Naš kłub jašče zachoŭvaje tearetyčnyja šancy na treciaje miesca ŭ hrupie, kab praciahnuć u lutym zmahańnie ŭ Lizie Jeŭropy.
Siońnia a 22:45: Šachcior — Atletyk.
