U Śvietłahorsku 25 listapada hramadski aktyvist invalid pieršaj hrupy Juryj Lašenka sprabavaŭ pravieści pikiet, kab źviarnuć uvahu hramadskaści i ŭładaŭ na prablemy invalidaŭ.
U 15:00 mužčyna pry sprobie razharnuć płakat na centralnaj płoščy byŭ apieratyŭna «zatrymany» rabotnikami «chutkaj dapamohi». Jaho ŭ litaralnym sensie panieśli ŭ mašynu «chutkaj» razam ź invalidnaj kalaskaj, paviedamili BiełaPAN žurnalisty, jakija stali vidavočcami zdareńnia.
Juryja Lašenku pavieźli. Paźniej udałosia vyśvietlić, što hramadski aktyvist znachodzicca ŭ terapieŭtyčnym adździaleńni rajonnaj balnicy i jaho apytvaje milicyja.
Nahadajem, Lašenka mieŭ namier 22 listapada pravieści pikiet z metaj pryciahnieńnia ŭvahi hramadskaści i vykazać pratest suprać nievykanańnia pravoŭ invalidaŭ pry kapitalnym ramoncie z elemientami madernizacyi žyłoha dvuchpaviarchovaha doma pa vulicy Lenina. Rajvykankam zabaraniŭ praviadzieńnie masavaha mierapryjemstva, matyvujučy heta tym, što miesca praviadzieńnia pikietu nie adpaviadaje patrabavańniam rašeńnia rajvykankama.
Zhodna z rašeńniem rajvykankama, u Śvietłahorsku možna pravodzić pikiet ci mitynh tolki ŭ adnym miescy — na sceničnaj placoŭcy ŭ haradskim parku kultury i adpačynku.
«Park znachodzicca na ŭskrainie horada, u zakinutym stanie. Pravodzić pikiet u parku prosta durnoje — tam ludzi naohuł amal nie chodziać. Dy i mnie prablemna było b tudy dabracca», — prakamientavaŭ rašeńnie vykankama aktyvist.
Jon mieŭ namier 25 listapadzie ŭsio ž taki pravieści pikiet.
