1. Film vyjdzie ŭ suśvietny prakat u piatnicu, 18 śniežnia 2015 hoda.
2. Vierahodna, biełarusy, jak toje niaredka byvaje, pabačać film na dzień raniej — kinapremjery ŭ biełaruskich kinateatrach prachodziać u čaćvier.
3. Pieršy tyzier-trejler za 24 hadziny prahladzieli bolš za 7 miljonaŭ raz.
4. Režysioram novaha epizoda staŭ Džej Džej Abrams, viadomy pa filmach «Zorny šlach», «Armahiedon» i «Pryhožaje žyćcio», a taksama sieryjałach «Zastacca ŭ žyvych», «Hrań», «Špijonka», «Pad prykryćciem» i «U poli zroku».
5. Abrams publična admaŭlaŭsia ad režysiorskaha kresła ŭ novych «Zornych vojnach». Jaho niepakoili maštaby prajektu i kulturnaja značnaść. Tolki paśla miesiaca pieramovaŭ jon pahadziŭsia.
6. Ad režysiorskaha kresła taksama admovilisia Bred Biord (uładalnik «Oskaraŭ» za «Ratatuj» i «Supiersiamiejku») i Metju Von («Zorny pył», «Ludzi Iks: Pieršy kłas»…).
7. Režysioram vośmaha epizoda stanie Rajan Džonsan («Piatla času»), jon ža napiša scenar dziaviataha epizoda.
8. Stvaralnik «Zornych vojnaŭ» Džordž Łukas staŭ tolki pradziusaram filma.
9. Kinastudyju Džordža Łukasa Lucasfilm u 2012 hodzie vykupiła za 4 młrd dalaraŭ Walt Disney. Džordž Łukas prakamientavaŭ anons novaha filma ŭ suśviecie «Zornych vojnaŭ» tak: «Ja viedaju, što Walt Disney zmohuć naležna praciahnuć idei i abaranić ich abyčajnaść».
10. Scenar filma napisaŭ Majkł Arndt («Mužnaja sercam», «Ablivijan», «Hałodnyja hulni: I ŭspychnie połymia») pavodle zapisaŭ Łukasa, jakija jon niekali rabiŭ dla praciaha «Zornych Vojn». Praz peŭny čas Arndt pakinuŭ prajekt, na jaho miesca pryjšli sam Abrams i Łoŭrens Kezdan (scenaryst piataha i šostaha epizodaŭ).
11. Dziejańnie siomaha epizoda razhorniecca praź niekalki dziasiatkaŭ hod paśla šostaha.
12. Pa słovach Łukasa, «Zornyja vojny» — historyja adnoj siamji.
Vierahodna, heta namiok na toje, što ŭ novym epizodzie značnaja rola dastaniecca Luku Skajuokieru, jaho siastry Lei Arhana, a mahčyma i ich dzieciam, ab losie jakich stvorana niemała aficyjnych i fanackich komiksaŭ.
13. U siomym epizodzie voźmuć udzieł mnohija aktory z aryhinalnaj tryłohii:
Mark Chemił (Luk), Kery Fišer (Leja), Harysan Ford (Chan Soła) i Bili Dy Ŭiljams (Łenda Kałrysijan). Taksama ŭ filmie voźmuć udzieł u svaich aryhinalnych rolach Entani Denijełs (robat C3PO), Kieni Bejkier (robat R2D2) i Piter Mechju (Čubaka).
14. Aktor aryhinalnaj tryłohii Denis Łosan, jaki vykonvaŭ rolu hieraičnaha piłota Vežda Antylesa, admoviŭsia ad udzieła ŭ siomym epizodzie.
15. Dart Vejder nie źjavicca ŭ novym filmie, jak i Impieratar.
Jany zahinuli ŭ šostym epizodzie. Adziny šaniec trapić u siomy epizod — u formie ŭspaminaŭ, «duchaŭ Siły» ci pasłańniaŭ-hałahram.
16. Roli novych aktoraŭ nieviadomyja. U filmie źjaviacca Džon Bajeha (hałoŭnaja rola ŭ «Čužych na rajonie»), Adam Drajvier (najbolš viadomy pa kamiedyjnym sieryjale «Dziaŭčaty») i Dejsi Rydli (nivodnaj značnaj roli da novych «Zornych vojn»).
17. U filmie taksama voźmie ŭdzieł Endy Sieris, viadomy jak Hołum z «Uładara riarścionkaŭ» i «Chobita». Nieviadoma, jakuju mienavita rolu vykanaje majstar ahučki i Motion Capture (technałohija zachopu ruchaŭ dla animacyi kampiutarnych piersanažaŭ). Ale hetaja rola, chutčej za ŭsio, budzie kamiedyjnaj i dramatyčnaj adnačasova.
18. U tyziery Džon Bajenha, jakomu praročać hałoŭnuju stanoŭčuju rolu ŭ novym filmie, źjaŭlajecca ŭ kaściumie impierskaha šturmavika. Ci jon stanie na bok Respubliki, ci ad pačatku jon byŭ špijonam Respubliki, ci prosta vykupiŭ trafiejny kaścium — taksama nieviadoma.
19. Mieč u rukach złodzieja (pavodle čutak, mienavita rolu złodzieja vykonvaje Adam Drajvier) maje niezvyčajnuju dla sieryi kanstrukcyju.
Akramia asnoŭnaha pramiania-laza na hardzie ŭklučajucca dadatkovyja pramiani. Karyść ad ich u bai sumnieŭnaja — kali mieč voraha praśliźnie pa asnoŭnym pramiani da hardy, jon nie sutykniecca z pramianiami hardy, a abrubić mietaličnuju častku. Chiba kali złodziej zatrymaje mieč voraha pierad hardaj, jon zmoža paškodzić ruku voraha.
20. U tyziery nie pakazvajucca aktory aryhinalnaj tryłohii, ale padčas zdymak Mark Chemił nasiŭ akuratnuju baradu. Vierahodna, u filmie Luk Skajuokier budzie paŭtarać źniešnie styl svajho nastaŭnika, Obi Vana Kenobi.
21. Najbolš pa časie ŭ filmie pakazvajecca pustynnaja płanieta — vierahodna, Tatuin, dzie naradziŭsia Anakin Skajuokier, a zatym žyŭ jaho syn Luk.
22. U tyziery źjaviŭsia i «Tysiačahadovy Sokał», lehiendarny karabiel Chana Soła.
23. Taksama ŭ tyziery pakazany atrad impierskich šturmavikoŭ u novaj bliskučaj brani i pahonia TIE-źniščalnikaŭ za «Sokałam». Vierahodna, u filmie budzie pakazanaje supraćstajańnie Novaj Respubliki z Askiepkam Impieryi.
24. U komiksach praz 25-30 hod paśla bitvy na Javinie (pryhkładny čas siomaha epizoda) adbyvajecca pierachod na ciomny bok siły byłoha džedaja, zatym viadomaha jak Dart Krajt. Praz sto hod jon utvoryć, zhodna komiksam, svaju mahutnuju Impieryju. Ci jon toj złodziej z tyziera — nieviadoma.
25. U hety ž čas, zhodna komiksam, na «dalokuju-dalokuju hałaktyku» napaduć juŭžań-vonhi — kryvažernaja rasa, nie čujnaja da siły. Abjadnanaja hałaktyka pieramoža ich u čatyrochhadovaj vajnie, ale ad mnohich płaniet zastanucca adno ruiny. U tyziery juŭžań-vonhi nie pakazanyja.
