Aleh Trusaŭ upeŭnieny: Kanhres za niezaležnaść patrebny i svoječasovy.
Najpierš źviartaje na siabie ŭvahu, što Kanhres budzie adbyvacca mienš čym za hod da prezidenckich vybaraŭ. Adnak, jak pierakonvaje staršynia TBM Aleh Trusaŭ, vyłučeńnie kandydata ŭ prezidenty na Kanhresie nie płanujecca: «Ja navat paspračaŭsia z Uładzimiram Niaklajevym na dźvie plaški harełki. Jon upeŭnieny, što my budziem vyłučać Alenu Anisim, a ja kažu, što – nie».
Ale ž sama Anisim, namieśnica Trusava pa TBM, u minułym nie vyklučała mahčymaści ŭdziełu ŭ prezidenckich vybarach. «Pravilna robić, što nie vyklučaje. I budzie vyłučacca, chutčej za ŭsio, ale pry ŭmovie źmienaŭ u vybarčym zakanadaŭstvie», – kaža Trusaŭ.
Z Hajdukievičam ci biez?
Aleh Trusaŭ havoryć, što ŭ pracy Kanhresa najmieniej prymie ŭdzieł 150 čałaviek, a kali pamiaškańnie budzie bolšym – to da 300. «My možam i tysiaču sabrać, i dźvie. Ale nie ŭ hetym pytańnie. Sama praca Kanhresu budzie doŭžycca nie bolej za 2 hadziny. Budzie pryniaty Manifiest, a taksama vybrany pastajanna dziejučy orhan Kahresa, jaki na stałaj asnovie budzie razhladać roznyja pytańni. Naprykład, nakont atamnaj stancyi ŭ Astraŭcy ci raźmiaščeńnia na našaj terytoryi rasijskich vajskovych bazaŭ… My budziem udzielničać u palityčnych hulniach. Naša meta adna – niezaležnaść krainy». (Hł. Źjaviŭsia prajekt Manifiesta ŭ abaronu niezaležnaści Biełarusi)
U pracy arhkamiteta Kanhresu za niezaležnaść biare ŭdzieł tolki adzin pradstaŭnik palityčnych siłaŭ – Ryhor Kastusioŭ z Partyi BNF. «Mahčyma, što dałučycca partyja Zianona Paźniaka, jany ciapier abmiarkoŭvajuć takuju mahčymaść. Ja navat viadu pieramovy z «Biełaj Ruśsiu», chaj pakul i nie vielmi plonnyja. My ličym, što patryjoty jość u luboj partyi, u luboj palityčnaj sile».
A ci praŭda, što ŭ Kanhresie prymie ŭdzieł ŁDPB baćki i syna Hajdukievičaŭ, jakija nieadnarazova skampramietavali siabie? «26 listapada plenum ŁDPB padtrymaŭ ideju praviadzieńnia Kanhresa. My nakiravali im Manifiest, kali jany pahadžajucca z asnoŭnymi punktami, to, kali łaska, chaj prymajuć udzieł jak zvyčajnyja hramadzianie», - havoryć Aleh Trusaŭ.
A voś staršynia Rady intelihiencyi Uładzimir Kołas razhladaje mahčymaść udziełu ŁDPB jak peŭnuju pravakacyju: «Asabista ja suprać, nijakaha entuzijazmu pa hetym pytańni ŭ mianie niama».
Bolš pra Kanhres i pra biahučyja spravy ŭ apazicyi čytajcie ŭ zaŭtrašnim numary papiarovaha tydniovika «Naša Niva».
