Palitźniavolenamu Mikałaju Dziadku aficyjna vystaŭlena novaje abvinavačańnie. Da hetaha jon znachodziŭsia ŭ statusie padazronaha, havorycca ŭ paviedamleńni ŭ hrupie «Svabodu Mikałaju Dziadku» ŭ sacyjalnaj sietcy «UKantakcie».
«Miera strymańnia pa novaj spravie nie abirałasia, tamu jon zastajecca da suda ŭ turemnaj asobnaj kamiery. Pavodle słoŭ źniavolenaha, asnoŭnyja jaho parušeńni — heta znachodžańnie ŭ kamiery ŭ spartyŭnym kaściumie. Heta ŭ našaj krainie zaviecca «złosnym niepadparadkavańniem», — havorycca ŭ paviedamleńni.
1 śniežnia była praviedziena sudova-psichałahičnaja ekśpiertyza, vyniki jakoj buduć viadomyja pry aznajamleńni sa spravaj. Raniej stała viadoma, što Mikałaja Dziadka abvinavačvajuć u čarhovy raz, tolki ŭžo na padstavie č. 1 art. 411 KK (złosnaje niepadparadkavańnie patrabavańniam administracyi papraŭčaj ustanovy, jakaja vykonvaje pakarańnie ŭ vyhladzie pazbaŭleńnia voli).
***
Nahadajem, Mikałaj Dziadok, a taksama Ihar Alinievič, Alaksandr Franckievič, jakija prachodzili ź im pa adnoj spravie, byli asudžanyja sudom Zavodskaha rajona Minska 27 maja 2011 hoda. Jany pryznanyja vinavatymi ŭ złačynstvach, praduhledžanych č. 2 art. 339 KK (złosnaje chulihanstva) i č. 2 i 3 art. 218 KK (naŭmysnaje źniščeńnie abo paškodžańnie majomaści). Im inkryminavaŭsia šerah napadaŭ na budynki i padpały, u pryvatnaści praviadzieńnie niesankcyjanavanaj antyvajennaj akcyi kala budynka Ministerstva abarony Biełarusi ŭ 2009 hodzie, zakidvańnie butelkami z zapalnaj sumieśsiu terytoryi pasolstva Rasii ŭ Minsku i budynka turmy na vulicy Akreścina ŭ 2010 hodzie.
Pravaabaroncy ličać prysud Mikałaju Dziadku i inšym asudžanym pa hetaj spravie palityčna matyvavanym i ličać Mikałaja Dziadka palityčnym źniavolenym.
Ciapier jon znachodzicca ŭ Mahiloŭskaj turmie, i, chutčej za ŭsio, chutka budzie pieraviedzieny ŭ SIZA. Źniavoleny pavinien byŭ vyjści na volu 3 sakavika 2015 hoda, adbyŭšy pakarańnie ŭ čatyry z pałovaj hoda pazbaŭleńnia voli. Artykuł 411 KK praduhledžvaje da hoda pazbaŭleńnia voli ŭ dapaŭnieńnie da asnoŭnaha terminu.
