U prakuratury Minskaj vobłaści praanalizavany pryčyny rezkaha rostu ŭ hetym hodzie padletkavaj złačynnaści ŭ rehijonie.
Jak paviedamiła prakuror adździeła pa nahladzie za vykanańniem zakanadaŭstva ab niepaŭnaletnich i moładzi abłasnoj prakuratury Taćciana Ziańkova,
za dzieviać miesiacaŭ 2014 hoda zarehistravany 342 złačynstvy, što na 79, ci na 30%, bolš, čym za anałahičny pieryjad 2013 hoda. Sa 189 da 238, ci na 26%, pavialičyłasia kolkaść udzielnikaŭ złačynstvaŭ.
Adnoj z asnoŭnych pryčyn rostu złačynnaści niepaŭnaletnich u prakuratury bačać słabuju arhanizacyju pracy orhanaŭ i ŭstanoŭ, upaŭnavažanych na ažyćciaŭleńnie prafiłaktyki bieznahladnaści i pravaparušeńniaŭ niepaŭnaletnich. Vyrašalnaja rola ŭ hetaj pracy naležyć orhanam vykanaŭčaj ułady, u tym liku kamisii pa spravach niepaŭnaletnich.
U prakuratury ŭkazvajuć, što paharšeńnie kryminalnaj abstanoŭki ŭ padletkavym asiarodździ adbyłosia šmat u čym z-za niedachopaŭ i niedahladaŭ u pracy milicyi, pierš za ŭsio farmalizmu, bieśsistemnaści, słabaj prafiesijnaj padrychtoŭki supracoŭnikaŭ, asabliva ISN, nizkaha i nierehularnaha viedamasnaha kantrolu.
Nie zabiaśpiečany naležny ŭzrovień uzajemadziejańnia i abmienu infarmacyjaj pamiž słužbami i padraździaleńniami milicyi.
Jość niedachopy i niedahlady ŭ pracy ŭstanoŭ adukacyi. Vychavaŭčaja praca z navučencami čaściej za ŭsio pravodzicca pa faktach učynieńnia imi supraćpraŭnych dziejańniaŭ i nie zaŭsiody źjaŭlajecca vynikovaj. Niedastatkovy ŭdzieł ustanoŭ adukacyi pa rańnim vyjaŭleńni dziaciej, schilnych da asacyjalnych pavodzinaŭ, a taksama jakija znachodziacca ŭ sacyjalna niebiaśpiečnym stanoviščy.
Nie na naležnym uzroŭni arhanizavana ŭzajemadziejańnie ŭstanoŭ achovy zdaroŭja ź inšymi subjektami prafiłaktyki pa pytańniach papiaredžańnia pravaparušeńniaŭ niepaŭnaletnich, źviazanych ź niezakonnym abarotam narkotykaŭ. U šerahu vypadkaŭ prafiłaktyčnaja praca ź niepaŭnaletnimi, jakija ŭžyvajuć ałkahol, narkotyki, nosić farmalny charaktar, nie vykonvajucca terminy i pieryjadyčnaść prafiłaktyčnych ahladaŭ asob nazvanaj katehoryi.
Źviestki ab zaniataści dziaciej u pazaŭročny čas nie zaŭsiody adpaviadajuć realnamu stanovišču spraŭ. Jość niedachopy ŭ pracy pa arhanizacyi volnaha času ŭ sielskaj miascovaści.
U hetaj suviazi nie efiektyŭny ŭpłyŭ orhanaŭ vykanaŭčaj ułady roznych uzroŭniaŭ na dziejnaść ustanoŭ i arhanizacyj u śfiery volnaha času padletkaŭ.
Vyklikajuć tryvohu prakuratury fakty samavolnych sychodaŭ dziaciej ź internatnych ustanoŭ i ź siemjaŭ, a taksama adsutnaść uzajemadziejańnia pamiž pravaachoŭnymi orhanami i zacikaŭlenymi słužbami pa infarmavańni ab hetych faktach i ich papiaredžańni.