U paniadziełak 8 śniežnia u Drezdenie prajšła čarhovaja antyisłamskaja demanstracyja, arhanizavanaja hramadskaj inicyjatyvaj PEGIDA (Patriotischen Europäer gegen die Islamisierung des Abendlandes), što značyć «Patryjatyčnyja jeŭrapiejcy suprać isłamizacyi Zachada».
Dadzienaja inicyjatyva ładzić takija mierapryjemstvy ŭ Drezdenie ŭžo treci tydzień zapar, i kožny raz kolkaść udzielnikaŭ pavialičvajecca. Kali na pieršuju demanstracyju pryjšło kala 5 tysiač čałaviek, na druhuju – bolš za 7, dyk učarašniaja sabrała bolš za 10 tysiač udzielnikaŭ.
Prykładna 11 tysiač čałaviek prajšli maršam uviečary ŭ centry Drezdena, kab vykazać svaju pazicyju nakont radykalizacyi musulman u Hiermanii, a taksama pavieličeńnia kolkaści imihrantaŭ u Hiermaniju. Cikava, što inicyjatyva PEGIDA starajecca pravodzić svaje mitynhi i maršy mienavita pa paniadziełkach. Mahčyma, heta paralel z paniadziełkavymi demanstracyjami, jakija mieli miesca pierad razbureńniem Bierlinskaj ściany 25 hod tamu.
Varta padkreślić, što demanstracyja nasiła całkam mirny charaktar. Nie było bačna pradstaŭnikoŭ ultrapravych subkulturnych elemientaŭ. Na fatahrafijach ź mitynhu možna pabačyć zvyčajnych niemcaŭ siaredniaha ŭzrostu. Heta nie było subkulturnym zboram kštałtu demanstracyj futbolnych chulihanaŭ i inšych radykalnych elemientaŭ, jakija pravodzilisia inicyjatyvaj HoGeSa (Hooligans gegen Salafisten) – «Chulihany suprać sałafitaŭ». Arhanizatary i ŭdzielniki mierapryjemstvaŭ PEGIDA u svaich zajavach dystancyrujucca ad radykalna pravych siłaŭ.
Heta bačna nie tolki pa ich zajavach, ale taksama pa charaktary demanstracyj i tych łozunhach, jakija jany vykarystoŭvajuć. Tak, na adnym z płakataŭ namalavany čałaviečak, jaki vykidvaje ŭ śmietnicu svastyku, čyrvonuju zorku, simvał tak zvanaha «antyfašysckaha supracivu», a taksama ściah «isłamskaj dziaržavy Iraka i Levanta». Heta aznačaje, što PEGIDA admaŭlaje lubyja formy radykalizma. Taksama na raściažkach i transparantach demanstrantaŭ mahčyma było pračytać łozunhi kštałtu «My – narod», «Suprać relihijnaha fanatyzmu», «Suprać relihijnych vojnaŭ na niamieckaj ziamli», «Za budučyniu našych dziaciej».
Cikava, što adnačasova z antyisłamskaj demanstracyjaj PEGIDA była arhanizavana demanstracyja suprać dadzienaj inicyjatyvy, jakaja taksama sabrała niekalki tysiač prychilnikaŭ. Jaje ŭdzielniki vystupili z łozunhami «Ja nie nacyst… Ale… Ale chto?» i «Rady bačyć biežancaŭ». Siarod udzielnikaŭ kontr-demanstracyi ŭ Drezdenie byli členy miascovaha isłamskaha centra, jaŭrejskaj abščyny, asacyjacyi zamiežnych žycharoŭ i hrupy pad nazvaj «Drezden biez nacystaŭ».
Adnoj z pryčyn uzrostańnia antyisłamskich nastrojaŭ u niamieckim hramadstvie ekśpierty nazyvajuć vialikuju kolkaść biežancaŭ, jakija prybyvajuć u Hiermaniju. Tak, tolki ŭ hetym hodzie kraina papoŭniłasia prykładna dźviuma sotniami tysiač biežancaŭ, što na 60% pieravyšaje padobny pakazčyk minułaha hoda. «Pavodle najaŭnych acenak, usiaho 230 tysiač prašeńniaŭ ab pradastaŭleńni prytułku źjaŭlajecca całkam dasiažnym pakazčykam», – tak Manfred Šmit, kiraŭnik Fiederalnaha viedamstva pa spravach mihracyi i biežancaŭ, prakamientavaŭ płany pa pryjomie biežancaŭ Hiermanijaj na 2015 hod u intervju niamieckaj rehijanalnaj haziecie Rheinische Post.
Na siońniašni momant kolkaść členaŭ supołki PEGIDA ŭ sacyjalnaj sietcy Facebook naličvaje bolš za 37 tysiač čałaviek. Taksama ŭ inicyjatyvy jość ułasny sajt, na jakim jany infarmujuć ab svaich demanstracyjach i ich rezultatach. Niamieckija praciŭniki isłamizacyi sprabujuć arhanizoŭvać akcyi nie tolki ŭ Drezdenie, ale i ŭ inšych haradach krainy – tak, užo prajšła pieršaja nievialikaja demanstracyja ŭ Dziusieldorfie, jakuju na sajcie nazvali «prahułkaj». Da taho ž jość sproby arhanizavać antyisłamskija demanstracyi i ŭ Bierlinie – druhim paśla Stambuła horadzie ŭ śviecie pa kolkaści pražyvajučych tam turak.
