 |
Teraryst vystraliŭ u jaje, kali jana pakidała pieradvybarčy mitynh svaich prychilnikaŭ u horadzie Ravałpindzi, što ŭ centry krainy. Kuli trapili joj u šyju i hrudzi, paśla čaho teraryst uzarvaŭ siabie. Sama mała 15 čałaviek zahinuli u vyniku vybuchu, šmat chto atrymaŭ ranieńni.
Jaje jašče sprabavali ratavać, zavieźli ŭ špital, ale marna.
Heta nia pieršy zamach na Bchuta. 18 kastryčnika, u dzień jaje viartańnia ŭ krainu, pa darozie z aeraportu, kali jaje vitali dziasiatki tysiač jaje prychilnikaŭ, kala braniravanaha aŭtobusa, u jakim jana znachodziłasia, była ŭzarvanaja mahutnaja bomba. Tady zahinuli 139 čałaviek.
Paśla taho vybuchu Benazir Bchuta skazała: "Ja viedaju, chto mianie choča zabić".
Pry viestcy pra śmierć Bchuta jaje prychilniki pačali skandavać “Mušaraf — sabaka!”
Natoŭp vysadziŭ šklanyja dźviery bolnicy, kudy zavieźli Bchuta. Ludzi płačuć i narakajuć.
Bchuta viarnułasia ŭ krainu paśla 9-hadovaje emihracyi, niahladziačy na zaściarohi ŭładaŭ. Jana pachodzić z zamožnaje siamji z daŭnimi palityčnymi tradycyjami. Jaje baćka, Zulfikar Ali Bchuta, byŭ zasnavalnikam Pakistanskaj Narodnaj Partyi (PPP) i premjeram krainy na pačatku 70-ch.
Jaho paviesili vajskoŭcy, abvinavaciŭšy ŭ karupcyi. Bchuta atrymała adukacyju ŭ Harvardzie i Oksfardzie. Kali Pakistan viarnuŭsia da demakratyi, paśla 1988 hodu, jana dvojčy vykonvała abaviazki premjer-ministra. U 1998 hodzie Bchuta vyjechała z krainy, ratujučysia ad sudu pa abvinavačańni ŭ karupcyi. U krasaviku 1999 hodu jana atrymała zavočny prysud. Sama jana nazyvała tuju sudovuju spravu “palityčnaj”.
Partyja Bchuta procistajała jak vajskovamu režymu hienerała Mušarafa, tak i musulmanskim palityčnym siłam jaje adviečnaha supiernika na palityčnaj scenie — Navaza Šaryfa. Jana była abjektam nianaviści relihijnych fundamentalistaŭ. I ŭ Pakistanie, i za miažoj jana ličyłasia symbalem sučasnaści, demakratyi i raŭnapraŭja žančynaŭ.
Pervez Mušaraf, dyktatar Pakistanu, 3 listapada prypyniŭ dziejańnie kanstytucyi i abvieściŭ nadzvyčajnaje stanovišča ŭ svajoj 160-miljonnaj, h.zn. u 16 razoŭ bolš nasielenaj, čym Biełaruś, krainie. Pakistan maje atamnuju zbroju i pry hetym znachodzicca ŭ kanflikcie z atamnaj Indyjaj, miažuje z Aŭhanistanam. Jaje raździrajuć palityčnyja i relihijnyja sprečki.
