Zavieršana rasśledavańnie kryminalnaj spravy, źviazanaj z atrymańniem chabaru za vyrašeńnie pytańnia ab pryznańni asoby nieprydatnym dla prachodžańnia terminovaj vajskovaj słužby, paviedamlaje pres-słužba Śledčaha kamiteta.
Śledčym kamitetam vyjaŭleny ŭvieś karupcyjny łancužok: chabarnik, pamahaty i chabaraatrymalnik. Rašeńnie ab zaviadzieńni spravy prymałasia ŭpraŭleńniem KDB pa Hrodzienskaj vobłaści.
Papiarednim rasśledavańniem ustanoŭlena, što zahadčyk adździaleńnia chirurhii adnoj z balnic Hrodna, źjaŭlajučysia słužbovaj asobaj, pa prośbie svajho znajomaha vypisaŭ i pieradaŭ praź jaho niepraŭdzivaje zaklučeńnie mužčynu 1992 h.n., jaki padlahaje pryzyvu na terminovuju vajskovuju słužbu.
Za atrymańnie padroblenaha miedycynskaha dakumienta chabaradavalnik pieradaŭ pasiaredniku 2500 dalaraŭ ZŠA. Pasiarednik ž u svaju čarhu acaniŭ pasłuhi doktara ŭsiaho ŭ 50 dalaraŭ ZŠA, a astatnija hrošy prysvoiŭ.
Dziejańni doktara kvalifikavanyja jak atrymańnie chabaru, złoŭžyvańnie słužbovymi paŭnamoctvami i dapamahańnie va ŭchileńni ad mierapryjemstvaŭ pryzyvu na vajskovuju słužbu; hora-pryzyŭnika — uchileńnie ad mierapryjemstvaŭ pryzyvu na vajskovuju słužbu; pasiarednika — padbuchtorvańnie i dapamahańnie da davańnia chabaru i złoŭžyvańnie słužbovymi paŭnamoctvami, dapamahańnie va ŭchileńni ad mierapryjemstvaŭ pryzyvu na vajskovuju słužbu, a taksama machlarstva ŭ častcy zavałodańnia hrašyma pryzyŭnika.
Abvinavačanyja vinu ŭ ździajśnieńni złačynstvaŭ pryznali ŭ poŭnym abjomie i viarnuli pradmiet chabaru, na jaki śledstvam nakładzieny aryšt.
Materyjały kryminalnaj spravy pieradadzienyja prakuroru dla nakiravańnia ŭ sud.
Va ŭstanovu achovy zdaroŭja śledstvam uniesiena pradstaŭleńnie ab likvidacyi pryčyn i ŭmoŭ, jakija sadziejničali ŭčynieńniu złačynstva, paviedamlaje pres-słužba SK.
