Skančajecca hod, i my chočam dać svojeasablivuju spravazdaču čytačam-achviaradaŭcam hazety, sajtu, knih.
Za hod my vydali 48 vypuskaŭ papiarovaj «Našaj Nivy»: dopisy dźviuch socień aŭtaraŭ drukavalisia ŭ joj.
Praca była intensiŭnaj: razam z hazetaj naš asiarodak vypuskaje internet-sajt, jaki abnaŭlajecca štodzionna, pieratvarajučysia ŭ takuju sabie štodzionnuju elektronnuju hazetu, i zmahajecca za pazycyju samaha papularnaha internet-resursu pa-biełarusku. Kolkaść aŭtaraŭ nn.by vymiarajecca sotniami.
Hałoŭny tormaz dla raźvićcia — niazvyčka internaŭtaŭ achviaravać na vydańnie sajtu. Karystalniki zvyklisia da darmovaha, tym samym abmiažoŭvajučy jakaść infarmacyjnych praduktaŭ. Uvohule, u vypracoŭcy zvyčki achviaravać — na dziejnaść palitykaŭ, jakija adlustroŭvajuć Vašy intaresy, na ŭstanovy i dziejačoŭ kultury, jakija tvorać dla Vašaj supolnaści, na cerkvy, pomniki ci, što pieršaradna ŭ biełaruskaj sytuacyi, — na infarmacyjnyja resursy, — kluč da pieramienaŭ u hramadztvie, da źmieny kodu palityčnaha, kulturnaha i byćciovaha, čaho tak prahnie niezaležnaja hramada, da čaho byccam by hatovaje hramadztva ŭ cełym, roznyja sacyjalnyja hrupy, ale što tak nijak i nia ździejśnicca ŭ Biełarusi. U hetym sensie jość čaho pavučycca ŭ amerykancaŭ, jakija finansujuć u svajoj krainie i palityčnyja kampanii kandydataŭ, i značnyja kulturnyja imprezy, dośvied hetaha pieraniała i biełaruskaja emihracyja. Forma dla pierakazu achviaravańniaŭ na «Našu Nivu» zaŭždy staić na sajcie.
Značnyja hramadzkija i intelektualnyja dyskusii adbyvalisia ŭ hetym hodzie na staronkach našaha vydańnia.
Šmat asałody dała nam vydavieckaja seryja «Kniharnia «NN». Za 2007 hod u joj vyjšła 17 pazycyj. Zadumanaja dla ŭšanavańnia 100-hodździa hazety, jana vyrasła za ramki pieršapačatkovaje idei i, mahčyma, zastaniecca ŭ jakaści stałaje, kali tolki ŭdasca zachavać minimalnuju akupnaść. Siońnia ŭ vytvorčaści majem 7 nastupnych tamoŭ: rychtujucca da pieravydańnia apošnija pryžyćciovyja knihi Vasila Bykava «Ściana» i «Pachadžanie», vydatnyja prazaiki Franc Siŭko i Jeva Viežnaviec publikujuć u našaj seryi svaje zborniki «Dzień bubna» i «Šlach drobnaj svołačy». Aleś Bieły rychtuje knižnaje vydańnie «Našaj stravy», što pabačyła śviet na staronkach hazety jak adzin z ambitnych niŭskich prajektaŭ. Hatovaja da druku novaja kniha Andreja Chadanoviča, a historyk Aleh Dziarnovič u praciah «Najiaśniejšaj Rečy Paspalitaj» rychtuje chrestamatyju pad pracoŭnaj nazvaj «Vialikaje Kniastva Litoŭskaje na staronkach «NN».
Užo amal całkam razyšlisia nakłady (1500 asobnikaŭ) dźviuch knih: «Sto li100ŭ na tut.by» našaha zorkavaha Andreja Chadanoviča (zastałosia mieniej za 80 ekz.) i «Zastajemsia! Sakavik 2006: pryvatnaje i ahulnaje» (zastałosia mieniej za 20 ekz.).
Darečy, tolki da 10 studzienia zachoŭvajucca staryja ceny na vydańni «Kniharni «Naša Niva». Paśla 10 studzienia ceny na ŭsie knihi ŭzrastuć na 50 %. Dyk nabyvajcie padarunak, jakim jašče i Vašy ŭnuki paciešacca.
«NN» vypuściła taksama poster z vyjavaj Janki Kupały i paspryjała vydańniu dysku «litaratury ŭ zapisie» Andreja Chadanoviča (u 2008 h. za im śledam majuć źjavicca zapisy Džeci i Žybula na kampaktach) — pradpryjemstvy kamercyjna zaviedama składanyja, ale važnyja dla zasvajeńnia biełaruskaj kulturaj novych mahčymaściaŭ i «asvajeńnia prastory».
Cudoŭnyja fatohrafy «NN» druhi hod zapar vydali kalandar. Redaktaraŭ asabliva ciešać tyja prajekty, jakija ludzi realizujuć kala «NN» samastojna, asobna. My hatovyja spryjać takim pradpryjemstvam, kolki našaj siły.
Naš asiarodak dapamahaŭ muzykam i hramadzkim dziejačam, spryjaŭ kniharam i dyskaram.
Za hod vyjšła 10 numaroŭ (adzin ź ich zdvojeny) časopisu «ARCHE», vakoł jakoha hurtujucca praduktyŭnyja navukovyja siły.
Časovyja tvorčyja kalektyvy pry hetym miesiačniku praciahvajuć šerah fundamentalnych prajektaŭ. Rychtujecca pieravydańnie (papraŭlenaje i dapoŭnienaje) zboru tvoraŭ historyka Jurja Turonka, pieršy nakład jakoha amal razyšoŭsia. Rychtujucca zbory tvoraŭ intelektuała i hramadzkaha dziejača pieršaj pałovy XX st. ksiandza Adama Stankieviča i litaraturaznaŭcy Adama Babareki — abodva byli źniščanyja savieckim režymam. Heta tysiačy i tysiačy mašynapisnych staronak. Vy dumajecie, nad hetym pracuje, jak kaliści ŭ savieckich akademičnych instytutach, kamanda ź dziasiatkaŭ navukovych supracoŭnikaŭ, jakija majuć vyznačany biudžet? Nie, heta ŭ kožnym z vypadkaŭ sprava troch-čatyroch entuzijastaŭ.
Redakcyi «ARCHE» i «NN» bačać svaju zadaču, svaju funkcyju dziela ahulnaha prahresu ŭ pašyreńni abjomu i jakaści vypuskanaj pradukcyi, u zachavańni kultury movy, moŭnaje tradycyi, i my ciešymsia, kali adčuvajem, što zdolnyja niešta rabić lepiej, čym rańš. Kožny z nas stavić pierad saboj usio novyja zadačy, kab kožny rubiel, achviaravany Vami, vykarystoŭvaŭsia z maksymalnaj efektyŭnaściu, kab nie marnavałasia ni adna pracoŭnaja chvilina, kab zachoŭvalisia uziatyja nami standarty. Hetuju patrabavalnaść my procistaŭlajem rehularnym zabaronam na druk i raspaŭsiud, padstupnaj prapahandzie łukašenkaŭcaŭ.
Asabliva nas ciešyć źjaŭleńnie ŭ našym i siabroŭskich asiarodkach hrupy padrychtavanych maładych ekanamistaŭ i palityčnych navukoŭcaŭ — specyjalistaŭ, na jakich u Biełarusi 90-ch byŭ deficyt.
My vychodzim z 2007 hodu z adčuvańniem tvorčaha rostu, z pačućciem pieramohi nad stracham, što paŭzie ź minułaha, i imunitetam da ślapoha spažyviectva, jakoje spakušaje ź vitrynaŭ.
Vializny entuzijazm vyklikaje ŭmacavańnie biełaruskaj dziaržaŭnaści. Adna za adnoj idei, jakija adkryvali i adstojvali «Naša Niva», «ARCHE», ich aŭtary i čytačy, jak kažuć, pranikajuć u masy, vyklikajuć pieravarot u mazhach, robiacca ahulnapryniatymi spačatku ŭ hramadzianskaj supolnaści — u tym jadry, u jakim vyśpiavaje budučynia nacyi, a paśla i ŭ dziaržaŭnym aparacie. Niachaj «varožyć hadziučnik varožy», niachaj Žadobiny praciahvajuć myślić u katehoryjach daŭno minułych hadoŭ, novaje razumieńnie nacyjanalnych intaresaŭ i nacyjanalnaje supolnaści vabiać i łučać, paśladoŭna nabližajučy čas pieratvareńnia Biełarusi ź imperskaj satrapii ŭ sapraŭdy niezaležnuju nacyju. Hazety, sajt, časopisy, knihi, dyski, kruhłyja stały i sustrečy z čytačami — heta našy vyniki hodu 2007, heta naša z vami «reč paspalitaja», supolnaja sprava.
* * *
U Kaladnym numary my tradycyjna padviali vyniki hodu — palityčnyja, haspadarčyja, kulturnyja i prosta ludzkija.
Taksama my nadrukavali nizku apaviadańniaŭ, roznych, usialakich, kab vy mahli vyrvacca ź śviatočnaha šalenstva, jakoje časam robicca niaścierpnym — usio bolš padarunkaŭ, bolš šakaladu, bolš praduktaŭ, bolš vykarystanych resursaŭ. Hetaje «bolš» na vačach pieratvarajecca ŭ «mienš». Mienšaje miesca ŭ sercy zajmajuć tyja padarunki, mienšuju radaść prynosiać słodyčy, a raskošnyja supolnyja viačery nie dajuć ačyščeńnia. Čym čaściej my myjem svaje aŭtamabili, tym mieniej vady zastajecca pad našaj ziamloj, a bolej deterhientaŭ traplaje ŭ pryrodu. My staim pierad patrebaj fundamentalnaj źmieny estetyčnych i etyčnych kryteraŭ; dziakuj sučasnaści choć by za ŭśviedamleńnie, nakolki mała čałaviectva viedaje pra Boha. Na hetaj vysokaj nocie dazvolcie nam skončyć hod 2007-y «Našaj Nivy».
