Adkładzienyja aperacyi ŭ špitali imia Kapernika ŭ Łodzi, paviedamlaje gazeta.pl. Strajkujuć anestezijolahi, chočuć bolšych zarobkaŭ. Dyrekcyja špitalu prapanuje 80 złotych (kala 33 dalaraŭ) za hadzinu pracy. «Zamała!» — adkazvajuć medyki.
Strajk niekalkich socień daktaroŭ paralizavaŭ adnu z najbolšych bolnicaŭ u Polščy.
Ahulny zarobak medyka ŭ bolšaści bolnicaŭ Polščy, kali razam z apłataj za dziažurstvy, pierasiahnuŭ užo rysu 10 000 złotych, adnak medyki praciahvajuć dabivacca padvyšak. Jany dobra arhanizavanyja ŭ prafsajuzy.
Sektar achovy zdaroŭja zastajecca ŭ Polščy dziaržaŭnym.
Na tuju ž temu paviedamlaje Biełaruskaja redakcyja Polskaha radyjo:
Z novaha hodu značna abmiežavany dapuščalny čas pracy lekaraŭ. Zhodna z eŭraźviazaŭskim rasparadžeńniem, medyki nia mohuć pracavać bolš za 48 hadzin u tydzień. Miž tym, vyśviatlajecca, što ŭ mnohich špitalach lekaraŭ zamała, kab zapoŭnić hrafik, prytrymlivajučysia vyznačanych hadzinnych normaŭ. Ź inšaha boku, hety čas moža być padoŭžany da 72 hadzin, kali lekar daść zhodu ŭ piśmovym vyhladzie. Medyki kažuć, što zhodziacca daŭžej pracavać, kali im za heta hodna zapłaciać. Ministar achovy zdaroŭja adkazvaje, što na pavyšeńni zarobkaŭ niama hrošaj. Vyjściem, jakoje prapanuje ministerstva, było b pavyšeńnie ŭznosaŭ za medyčnaje strachavańnie na 2%.
Pakul što špitali ŭ bolšaści pracujuć narmalna. Tak što jość nadzieja, što medyki damoviacca z uradam, i heta nie adbudziecca koštam pacyjentaŭ.
