Anais Beskon, Kajsa Miakiarajnien i Nadzieja Skardzina. Fota: IBU/Rene Miko
Biełaruskaja bijatłanistka Nadzieja Skardzina zaniała 3-je miesca ŭ honcy z masavaha startu na 12,5 km, jakaja siońnia adbyłasia na 3-m etapie Kubka śvietu ŭ słavienskaj Paklucy, paviedamlaje BiełTA.
Nadzieja Skardzina biez promachaŭ pieraadoleła ŭsie čatyry ahniavyja rubiažy i finišavała z vynikam 34 min. 34,6 siek., adstaŭšy ad pieramožcy na 15,8 siek. Najlepšy čas — 34 min. 18,8 siek. pakazała finskaja bijatłanistka Kajsa Miakiarajnien, niahledziačy na dva promachi. Druhoje miesca zaniała francužanka Anais Beskon (7,6 siek.; biez promachaŭ).
Lidar zbornaj Biełarusi Darja Domračava na pieršym ahniavym rubiažy pramachnułasia adzin raz i vypraviłasia na štrafny kruh, na vychadzie ź jakoha na chutkaści sutyknułasia z adnoj z supiernic, upała i paškodziła zbroju. Z-za techničnych prablem jana zrabiła čatyry promachi pry druhim vizicie na strelbišča, da taho ž zamiena vintoŭki zaniała niekatory čas. Adstavańnie Domračavaj ad lidera honki na toj momant pieravyšała try chviliny. Darja Domračava syšła z dystancyi.
A Nadziei Skardzina, surjozna mabilizavaŭšy siły, zmahła ŭtrymacca ŭ liku lideraŭ. Biełaruskaja spartsmienka nie źmiryłasia z čaćviortym miescam i zdoleła abahnać češku Habryełu Soŭkałavu, jakaja išła treciaj.
U ahulnym zaliku Kubka śvietu siezona 2014/15 Nadzieja Skardzina idzie 15-j (182 ački). Darja Domračava pieramiaściłasia z 2-j na 3-ju pazicyju. U jaje pa-raniejšamu 303 ački, a druhoj stała ukrainka Valancina Siemiarenka (328), jakaja finišavała ŭ siońniašnim mas-starcie na 5-m miescy. Lidarstva ŭ Kubku śvietu pa-raniejšamu za Kajsaj Miakiarajnien (422).
