Aktyvist Kansiervatyŭna-chryścijanskaj partyi — BNF Siarhiej Kavalenka asudžany na 10 sutak administracyjnaha aryštu. Takoje rašeńnie pryniaŭ 27 śniežnia sudździa Pieršamajskaha rajona Viciebska Andrej Prejs, paviedamiła žonka asudžanaha Alena Kavalenka.
Pavodle jaje słoŭ, Siarhiej pryznany vinavatym va ŭčynieńni drobnaha chulihanstva na padstavie artykuła 17.1 Kodeksa ab administracyjnych pravaparušeńniach. Jaho, u pryvatnaści, abvinavacili ŭ tym, što jon spraŭlaŭ patrebu ŭ hramadskim miescy i akazvaŭ supraciŭleńnie rabotnikam milicyi.
Siarhiej Kavalenka, jaki z 2013 hoda vučycca ŭ Polščy, pryjechaŭ na kanikuły tydzień tamu, raskazała Alena. Jon byŭ zatrymany 24 śniežnia nieŭzabavie paśla taho, jak na šmatpaviarchovym domie ŭ centry Viciebska byŭ vyviešany vialiki bieł-čyrvona-bieły ściah.
Toje, što adbyvałasia ŭ sudzie Alena Kavalenka nazvała biazładździem. Jana asobna padkreśliła, što jaje mužu było admoŭlena skarystacca pasłuhami svajho advakata — zamiest hetaha dali dziažurnaha, jaki abvinavačvanaha faktyčna nie abaraniaŭ.
Adbyvać pakarańnie Kavalenka budzie ŭ izalatary časovaha ŭtrymańnia Viciebska. Jon pavinien vyzvalicca 3 studzienia kala 17.00. U znak pratestu suprać svajho zatrymańnia aktyvist jašče dva dni tamu abviaściŭ haładoŭku, paviedamiła Alena Kavalenka.
Siarhiej Kavalenka nieadnarazova zatrymlivaŭsia milicyjaj. Try hady tamu jaho sudzili za vyviešvańnie bieł-čyrvona-biełaha ściaha na hałoŭnaj navahodniaj jołcy Viciebska. U miescach pazbaŭleńnia voli jon abviaściŭ haładoŭku, jakaja doŭžyłasia kala dvuch miesiacaŭ.
