Pieršaje ŭražańnie, kali daviedaŭsia, što Michaił Anatoljevič Žuraŭkoŭ pryznačany ministram adukacyi Respubliki Biełaruś — šok! Z adnaho boku — vielmi dobra, a z druhoha — čałavieka škada.
Uvohule, nie razumieju voś takija masavyja źmieny ŭ kiraŭnictvie. Tak, mahčyma hodnyja ludzi, ale sutnaść ža nie ŭ ich, sutnaść u tym, što sistemu, padychody da pracy treba mianiać. Ludzi mianiajucca, a kraina ŭsio tam ža… Adno ciešyć, što za adukacyju ŭ bližejšy čas možna nie chvalavacca.
Jak pieršy prarektar BDU, Michaił Žuraŭkoŭ zasłužyŭ vialikuju pavahu supracoŭnikaŭ i studentaŭ. Akuratny, adkryty spartyŭny – hulaŭ u valejboł, rektarat suprać studentaŭ. U svaje 53 hady Žuraŭkoŭ — padciahnuty mužčyna.
Nie ŭsie viedajuć, ale Žuraŭkoŭ apošnija hady šmat uvahi nadavaŭ Bałonskamu pracesu. Dziakujučy jamu, BDU zrabiŭ vielizarny ryvok u hetym nakirunku. Jak staršynia hramadskaha abjadnańnia «Studencki sajuz BDU» ja 16 maja 2013 hoda prysutničaŭ na infarmacyjna-adukacyjnym sieminary «Bałonski praces i praviadzieńnie reformy vyšejšaj adukacyi ŭ ahulnajeŭrapiejskaj adukacyjnaj prastory», jaki byŭ arhanizavany Jeŭrakamisijaj u ramkach 4-j płatformy Uschodniaha partniorstva i byŭ mocna ździŭleny zacikaŭlenaściu Žuraŭkova ŭ hetym pytańni.
Darečy, jon vałodaje zamiežnaj movaj. Ci mnohija ministry hetym mohuć pachvalicca?
Kažučy pra čałaviečyja jakaści novaha ministra adukacyi, chaču jašče raspavieści historyju z asabistaha žyćcia. Uviesnu hetaha hoda źviarnuŭsia da Žuraŭkova M.A. z asabistym pytańniem. Pry ŭsioj zaniataści tady jašče pieršy prarektar BDU, znajšoŭ niekalki hadzin dla mianie i dapamoh.
Karaciej, budziem mieć ministra, za jakoha soramna nie budzie. Raniej taki byŭ ministr kultury — Łatuška. Zaraz i ŭ adukacyi mohuć być źmieny da lepšaha.
