Alaksandr Łukašenka abiacaje praciahnuć kurs na amaładžeńnie kadraŭ va ŭsich śfierach. Ab hetym jon zajaviŭ, pradstaŭlajučy 30 śniežnia 55-hadovaha Alaksandra Kosinca na pasadu kiraŭnika Administracyi prezidenta.
Łukašenka padkreśliŭ, što jaho hałoŭnyja patrabavańni da kadraŭ zastajucca niaźmiennyja, novyja pryznačeńni dali start pracesu amaładžeńnia kadraŭ. «I taki kurs budzie praciahnuty va ŭsich śfierach našaha žyćcia. Heta pavinna stać vašaj paŭsiadzionnaj zadačaj — mieć rezierv kadraŭ, kab ź jaho vychavać maładych kiraŭnikoŭ, zdolnych znachodzić chutkaje rašeńnie ŭ luboj niestandartnaj situacyi. Inakš my bieznadziejna adstaniem ad śvietu, jaki imkliva źmianiajecca vakoł nas», — cytuje Łukašenku dziaržaŭnaje ahienctva BiełTA.
Jon zajaviŭ, što treba surjozna papracavać z bankam danych adoranaj moładzi. «Heta — hałoŭnaje bahaćcie, ź jakim my pavinny pracavać. Tak, nie ŭsie ź ich, ale mnohija stanuć kiraŭnikami. Treba tolki vypracavać sistemu, kab hetych ludziej pravieści ź nizu da vierchu da kirujučaj viertykali», — adznačyŭ kiraŭnik dziaržavy.
Pry hetym Łukašenka ličyć, što «nie moža być dobrym ministram čałaviek, jaki nie bačyŭ stanka ŭ rabočym cechu ci ziamli na sielhaspradpryjemstvie». «Nie moža być dobrym ministr adukacyi, jaki nie viedaje, što takoje škoła, VNU. Nie moža być dobrym kiraŭnikom čałaviek, jaki nie viedaje žyćcia», — zajaviŭ jon.
