Urad FRH źmianiŭ pazicyju pa mahčymym vychadzie Afin ź jeŭrapiejskaha valutnaha sajuza. Ab hetym piša Deutsche Welle.
Radykalnyja levyja siły ŭ Hrecyi majuć charyzmatyčnaha, maładoha i hnutkaha lidara — Aleksisa Cyprasa.
Kancler FRH Anhieła Mierkiel (Angela Merkel) i ministr finansaŭ Volfhanh Šojble (Wolfgang Schäuble) pry nieabchodnaści hatovyja dapuścić padobnaje raźvićcio padziej i ličać, što ahulnajeŭrapiejskaja valuta z hetym spravicca. Pra heta vydańnie paviedamiła ŭ subotu, 3 studzienia, spasłaŭšysia na krynicy va ŭradavych kołach.
Pryčynaj pieramieny adnosiny Bierlina da mahčymaha vychadu Hrecyi ź jeŭrapiejskaha valutnaha sajuza, pa dadzienych štotydniovika, stali pośpiechi, dasiahnutyja jeŭrazonaj paśla kryzisu ŭ 2012 hodzie. Pahrozy razrastańnia kryzisu ŭ inšych krainach jeŭrazony, u pryvatnaści, u Partuhalii i Irłandyi, bolš niama, ličyć niamiecki ŭrad. Akramia taho, u jeŭrazonie stvorany novyja antykryzisnyja miechanizmy, da prykładu, jeŭrapiejski stabilizacyjny fond ESM.
Akramia taho, Bierlin ličyć vychad Hrecyi ź jeŭrazony praktyčna niepaźbiežnym, kali na daterminovych parłamienckich vybarach pieramoža Kaalicyja radykalnych levych sił (SIRYZA), a jaje lidar Aleksis Cypras ŭznačalić kabiniet ministraŭ i vykanaje abiacańnie admovicca ad kursu ekanomii i nie viartać zapazyčanaść.
Aleksis Cypras — charyzmatyčny, małady i hnutki lidar radykalnych levych. Levyja i kamunisty vyłučali jaho ŭ jakaści kandydata na pasadu staršyni Jeŭrakamisii. Jon staŭ taksama novaj ikonaj trackistaŭ i alterhłabalistaŭ va ŭsim śviecie. U partyju Cyprasa źjadnalisia dziasiatki levych hrupovak, akramia ćvierdałobych kamunistaŭ. Siarod jeŭradeputataŭ ad Siryzy — lehienda levaha ruchu Hrecyi, 92-hadovy Manolis Hlezas i Kastadynka Kunieva — imihrantka z Bałharyi, što pracavała ŭ Hrecyi prybiralščycaj i jakaja zastałasia ślapoju ŭ vyniku taho, što jaje ablili siernaj kisłatoj u pomstu za jaje prafsajuznuju aktyŭnaść.
U toj ža čas niekatoryja adznačajuć suviazi partyi Cyprasa z Maskvoj.
Jak adznačaje ahienctva DPA, viedamstva fiederalnaha kanclera i ministerstva finansaŭ FRH admovilisia kamientavać infarmacyju Der Spiegel. Poŭnaja viersija materyjału budzie apublikavanaja ŭ papiarovaj viersii štotydniovika ŭ paniadziełak, 5 studzienia.
