Deputaty Dziaržaŭnaj dumy Alaksandr Sidziakin i Aleh Saŭčanka vyjšli na suviaź z Antarktydy.
Z parłamientaryjami źviazalisia pradstaŭniki turfirmy «Siem viaršyniaŭ», jakaja arhanizavała ich ekśpiedycyju. Suviaź ź Sidziakinym i Saŭčankam źnikła, kali jany sprabavali padniacca na pik Vinsan — vyšejšy punkt kantynienta.
Raniej u Rasijskaj antarktyčnaj ekśpiedycyi paviedamili, što deputaty prybyli ŭ Antarktydu ŭ parušeńnie zakona RF ab dziejnaści na kantyniencie, za jaki jany sami hałasavali ŭ Dziarždumie.
«Ja nie razumieju, jakim čynam deputaty Dziarždumy apynulisia ŭ Antarktydzie. Mnie absalutna dakładna viadoma, što nijakaja jurydyčnaja abo fizičnaja asoba nie źviartałasia za dazvołam na dziejnaść u Antarktycy ŭ 2015 hodzie, źviazanuju z hornym uzychodžańniem. Da nas jany nijak nie źviartalisia», — zajaviŭ kiraŭnik Rasijskaj antarktyčnaj ekśpiedycyi (RAE) Valeryj Łukin.
U vyniku RAE nie zmoža akazać dapamohu parłamientaryjam, kali spatrebicca arhanizavać vyratavalnuju apieracyju.
«My pavinny niametavym čynam vykarystać biudžetnyja hrošy? Da nas potym Padlikovaja pałata pryjdzie. Niama ŭ Antarktydzie aficyjnych vyratavalnych słužbaŭ. Lubyja pošukavyja raboty ažyćciaŭlajucca za košt nacyjanalnych ekśpiedycyj. Ale raz jany damovilisia ź niejkaj łahistyčnaj arhanizacyjaj, jakaja ich tudy dastaviła, to jany pavinny byli praduhledzieć i vyratavalnuju apieracyju», — rastłumačyŭ kiraŭnik ekśpiedycyi.
Pradstaŭnik firmy «Siem viaršyniaŭ» Volha Rumiancava zajaviła, što ŭ vypadku NS prachodziła b zvyčajnaja vyratavalnaja apieracyja pa amierykanskaj strachoŭcy z samalotam i miascovymi hidami.
