9 studzienia ŭ kniharniach Italii źjaviŭsia ŭ prodažy novy raman słavutaha piśmieńnika Umbierta Eka. Kniha nazyvajecca Numero Zero («Numar nul»).
Papiaredni raman Eka – «Pražskija mohiłki» – vyjšaŭ u 2010 hodzie. Cikava, što paśla jaho vydańnia piśmieńnik u intervju The Paris Review skazaŭ, što, vierahodna, bolš nie budzie pisać ramanaŭ. Jak bačym, słova nie strymaŭ.
Darečy, u «Pražskich mohiłkach» zhadvajecca Minsk. «Heta Jakab Brafman, vychrast, vykładčyk habrejskaj movy ŭ Minskaj duchoŭnaj sieminaryi. Jon prajezdam u Paryžy jakraz pa daručeńni pałkoŭnika Dźmitryja, to bok Treciaha adździaleńnia», «U mianie ŭ rasparadžeńni dakumienty minskaha kahału z 1794 pa 1830. Usio zapisana. Kožnuju drobiaź zapratakaliravaŭ»,
«Ja zasumniavaŭsia: ci mahčyma, majučy tolki hetyja dakumienty, stvoranyja boh viedaje ŭ jakim dalokim kucie Uschodniaj Jeŭropy, dakazać na ich padstavie mahutnaść Suśvietnaha kahału?»
U novym ramanie Eka źviartajecca nie da časoŭ Frydrycha Barbarosy (jak u «Baŭdalinie»), ci pachodaŭ Harybaldzi (jak u «Pražskich mohiłkach). Na hety raz padziei adbyvajucca ŭ 1990-ch u Miłanie. Hałoŭny hieroj — redaktar haziety, jakaja stvarałasia z metaj pisać paklopnickija artykuły na biznesmenaŭ. Nie abydziecca ŭ ramanie biez masonskich łožaŭ, zamachaŭ na Papu, a taksama šmat pra italjanskija palityčnyja padziei taho času.
Umbierta Eka 83 hady. Jon viadomy ŭ Italii i śviecie historyk, fiłosaf, siemijotyk. Svoj pieršy raman — «Imia ružy» — Eka napisaŭ až u 48 hadoŭ. Hetaja kniha pryniesła jamu suśvietnuju viadomaść. «Numar nul» — heta siomy raman Eka.
