23 studzienia ŭ sudzie Maładziečanskaha rajona pryniali rašeńnie pa spravie «Ekadoma» suprać «Viales-Mit». Sud nie zadavoliŭ patrabavańni ekołahaŭ ab spynieńni dziejnaści «Viales-Mit» z-za taho, što jany nie dali patrebnaj dakumientacyi na niezaležnuju ekałahičnuju ekśpiertyzu pa budaŭnictvie dvuch śvinakompleksaŭ u Maładziečanskim rajonie.
«Sud pahadziŭsia z pazicyjaj adkazčyka, što «Viales-Mit» nie maje naležnaha prajekta śvinakompleksaŭ, — kaža juryst, jaki abaraniaŭ intaresy «Ekadoma», Siarhiej Mahonaŭ. — Usie dakumienty pa budaŭnictvie, jakija tyja rychtavali da hramadskaha abmierkavańnia, vyjavilisia niedapracavanymi i ciapier u ich unosiać źmieny».
Paśla dapracoŭki znoŭ budzie acenieny ŭpłyŭ prajekta na navakolnaje asiarodździe, a zatym jon budzie pieradadzieny na hramadskuju ekałahičnuju ekśpiertyzu – tak abiacaje zakazčyk, i biez hetaha prajekt nie projdzie dziaržaŭnuju ekałahičnuju ekśpiertyzu.
Siarhiej Mahonaŭ skazaŭ, što pakul nieviadoma, kali dakumienty buduć padrychtavanyja, bo navat pradstaŭnik «Viales-Mit» nie viedaje hetaha.
Sud spahnaŭ z «Ekadoma» jak prajhrałaha boku čatyry miljony rubloŭ u jakaści častkovaj kampiensacyi adkazčyku.
Pa słovach Siarhieja Mahonava, na advakata «Viales-Mit» vydatkavaŭ 37 800 tysiač rubloŭ.
Z ulikam źmienaŭ u prajekcie taksama pavinna pravodzicca hramadskaje abmierkavańnie, ale hety momant u zakanadaŭstvie nie ŭrehulavany. Prajekt mohuć adrazu pieradać na ekałahičnuju ekśpiertyzu.