Fanaty FK «Hancavičy». Fota ź ich staronki UKantakcie.
Niadaŭna navinavy partał govorim.by adrapartaŭ ab vynikach pasiedžańnia kamisii pa spravach niepaŭnaletnich u Hancavičach, padčas jakoha asablivuju ŭvahu nadali tak zvanym «fanatam» miascovaha futbolnaha kłubu — dvoje ź ich patrapili na kamisiju za bojku ź Ivacevickimi «kalehami» ŭ žniŭni minułaha hodu.
Voś što ab hetym piša govorim.by:
«Bolš za dziasiatak padletkaŭ i maładych ludziej, jakija nazyvajuć siabie futbolnymi fanatami FK «Hancavičy», vyrašyli «źjeździć u hości» da futbolnych fanataŭ horada Ivacevičy. U vyniku dvoje ź ich, navučency Hancavickaha liceja sielskahaspadarčaj vytvorčaści, apynulisia na pasiadžeńni kamisii pa spravach niepaŭnaletnich.
Fanaty FK «Hancavičy».
Pa ich słovach, rašeńnie pajechać u Ivacevičy było absalutna spantannym. Jany chacieli napałochać fanataŭ FK «Ivacevičy», dakazać tym, što jany ich nie bajacca, a na nastupny dzień była zapłanavana hulnia. Z telefona adnaho ź ich chtości vyklikaŭ mikraaŭtobus, i kala 19.00 chłopcy vyjechali z Hancavič.
Pryjechaŭšy, adzin z fanataŭ adzieŭ šapku z prarezami dla vačej «dla psichałahičnaha zapałochvańnia». Paśla hetaha maładyja ludzi pajšli błukać pa horadzie ŭ pošukach «vorahaŭ». Jany navat padyšli da kampanii ŭ parku, kab udakładnić, ci niama siarod ich futbolnych fanataŭ. Ich navat nie źbiantežyła toje, što siarod prysutnych byli troje dziaŭčat.
U rešcie rešt jany ŭsio ž znajšli fanataŭ FK «Ivacevičy». Adbyłosia heta na vakzale. Dvoje navučencaŭ liceja pahnalisia za adnym ź ich, kab, pa ich słovach, jaho napałochać, čym parušyli hramadski paradak. U vyniku adbyłasia bojka, paśla jakoj udzielniki «akcyi pa zapałochvańni» apynulisia ŭ adździaleńni RAUS na transparcie.
Naturalna, baćki byli nie ŭ kursie, što ich dzieci pajechali ŭ inšy horad, a tym bolš, što jany parušyli hramadski paradak. Tamu ranišnija pošuki ŭłasnych dziaciej dla ich abiarnulisia vielizarnym siurpryzam».
Dalej aŭtarka artykułu kanstatuje, što štrafam u 360 tysiač rubloŭ kožnamu sprava nie skončyłasia — namieśnik načalnika Hancavickaha RAUS zajaviŭ, što pa jahonaj infarmacyi fanaty FK «Hancavičy» mohuć być amatarami «spajsu» — u hetym nakirunku, maŭlaŭ, budzie praviedziena rasśledvańnie.
A namieśnik staršyni Hancavickaha rajvykankama pajšoŭ jašče dalej, daručyŭšy adździełu sportu i turyzmu rajvykankama razabracca ŭ tym, «jak chłopcy traplajuć u fan-kłub, čym jany tam zajmajucca, daviedacca padrabiaznaści ab dziejnaści hancavickich fanataŭ».
Daviedka: fanacki ruch FK «Hancavičy» utvaryŭsia ŭ 2005 hodzie, i na siońnia naličvaje blizu 40 čałaviek.