U apublikavanym učora artykule rezervist Źmicier Kaniaviec, jaki prachodziŭ vajskovyja zbory ŭ kancy 2014 hodu, raspaviadaje, što sałdat padčas palitinfarmacyi zmušali hladzieć rasiejskija kanały i telebačańnie «ŁNR». Aficery pry hetym dazvalali sabie antyŭkrainskija vykazvańni.
Načalnik upraŭleńnia infarmacyi hałoŭnaha ŭpraŭleńnia idealahičnaj pracy Ministerstva abarony pałkoŭnik Uładzimier Makaraŭ zajaviŭ Radyjo Svaboda, što artykuł «Našaj Nivy» — «čarhovaja pravakacyja».
«Infarmacyja, jakaja ŭtrymlivajecca ŭ artykule, absalutna nie adpaviadaje rečaisnaści. Vajskoŭcaŭ biełaruskaj armii pavodle aznačeńnia nia mohuć i nie prymušajuć hladzieć telebačańnie ŁNR. Heta niemahčyma, pa-pieršaje, tamu, što ŭ biełaruskaj armii realizujecca idealohija biełaruskaj dziaržavy i ŭ rasparadak dnia ŭklučany prahlad tolki biełaruskich telekanałaŭ, u pryvatnaści, prahramy «Panarama». Nia kažučy ŭžo pra adsutnaść techničnaj mahčymaści pryjomu tam telebačańnia ŁNR abo čahości padobnaha», — adznačyŭ Makaraŭ.
Jon zajaviŭ, što nie adpaviadajuć rečaisnaści i inšyja tezy artykuła — naprykład, pra toje, što sałdaty ŭ armii saromiejucca razmaŭlać na biełaruskaj movie, bo kažuć, što «na biełaruskaj razmaŭlajuć tolki śviadomyja i admarozki». «Heta ŭsio chłuśnia i pravakacyja», — zajaviŭ Makaraŭ.
Jon paviedamiŭ, što ciapier Minabarony pravodzić pravierku nakont taho, ci sapraŭdy słužyŭ Źmicier Kaniaviec u vojsku, ale pakul paćvierdžańnia hetaj infarmacyi niama.
Adkazvajučy na pytańnie, ci isnujuć niejkija zaćvierdžanyja kiraŭnictvam padychody da razmovy z sałdatami nakont padziejaŭ va Ŭkrainie, Makaraŭ padkreśliŭ, što hetyja padychody całkam adpaviadajuć aficyjnaj pazycyi Alaksandra Łukašenki.
«Jość aficyjnaja pazycyja kiraŭnika biełaruskaj dziaržavy, jakaja cudoŭna vykładziena ŭ šmatlikich publikacyjach — heta i jość toje, što možna kazać (sałdatam). Jašče raz padkreślivaju: my realizujem idealohiju biełaruskaj dziaržavy, idealohiju i palityku kiraŭnika dziaržavy Alaksandra Ryhoraviča Łukašenki», — zajaviŭ jon.
* * *
Ad Redakcyi
Dadzieny artykuł dasłaŭ čytač. Materyjał vyłučajecca hruntoŭnaściu, i niama padstavaŭ jamu nie daviarać. Dumajecca, sp.Makaraŭ prosta nie zrazumieŭ, što havorka idzie pra siužety, źniatyja bajevikami «ŁNR», i pakazanyja na rasijskich kanałach. A čamu sałdatam dajuć — zmušajuć! — hladzieć rasijskija kanały — heta, sapraŭdy, vialikaje pytańnie. I niapravilna, spadaru Makaraŭ, adrazu ŭ łob kazać, što hetaha niama. Raźbiaryciesia spačatku, praviercie.
