Žury premii «Debiut» imia Maksima Bahdanoviča vyznačyła karotki śpis naminantaŭ na atrymańnie ŭznaharod hetaha litaraturnaha spabornictva, paviedamili ŭ Biełaruskim PEN-Centry.
Tak, u naminacyi «Proza» pradstaŭleny Vital Voranaŭ z knihaj apaviadańniaŭ «Šeptam», Alaksiej Pałačanski i jaho prazaičny zbornik «Moj ćvik», a taksama Raman Śviečnikaŭ ź pieršaj častkaj dziońnikaŭ padarožnika «Roma jedzie».
Za atrymańnie premii ŭ halinie paezii pazmahajucca Taćciana Niadbaj sa svajoj debiutnaj knihaj «Sireny śpiavajuć džaz», Anton Rudak sa zbornikam «Vierchni horad» i Julija Cimafiejeva z «Knihaj pamyłak».
Arhanizatary litaraturnaj premii paviedamili, što sioleta premija ŭ naminacyi «Pierakład» prysudžacca nie budzie.
Abviaščeńnie favarytaŭ premii i cyrymonija ŭznaharodžańnia adbudziecca viečaram 24 sakavika ŭ filijale Dziaržaŭnaha muzieja historyi biełaruskaj litaratury «Litaraturny muziej Maksima Bahdanoviča» ŭ Minsku. Łaŭreaty premii atrymajuć pryz u vyhladzie čeka na 30 młn biełaruskich rubloŭ ad dabračynnaha fondu «Viartańnie».
Štohadovaja premija «Debiut» była zasnavanaja ŭ 2010 hodzie Biełaruskim PEN-centram i Sajuzam biełaruskich piśmieńnikaŭ pry padtrymcy biźniesmiena Paŭła Bierahoviča. Premija ŭručajecca aŭtaram, jakim nie bolš za 35 hadoŭ, za lepšyja debiutnyja tvory ŭ žanrach prozy, paezii i mastackaha pierakładu.